887/2026-2027

Lunglei, 2026 Nikir thla ni 8: Vawiin khan Lunglei District Deputy Commissioner (Bawrhsap) Pi Navneet Mann chuan a hna thawh pindanah India ram puma nurse hna thawk ṭha chawimawina, National Florence Nightingale Award 2026 dawngtu Pi Lalenthangi Hnamte (Health Worker, Ayush Health & Wellness Centre, Tuichawng) hnenah lawmpuina thuziak leh thilpek a hlan.

Lunglei District Bawrhsap Pi Navneet Mann chuan Pi Lalenthangi Hnamte-in Award a dawn chu District pum hlawhtlinna a nih thu leh District tana hun chhinchhiah tlak leh lawmawm tak a nih thu a sawi a. Pi Lalenthangi Hnamte-in a thawhna hmuna mite tana hriselna kawnga a hna thawh ṭha tak takte chu chhuanawm leh entawn tlak a tih thu sawiin, a inpekna leh ṭhahnem ngaihnaah lawm thu a hrilh a. A Award dawn chu an lawmpui thu sawiin, ṭha taka hna thawh chhunzawm zel a, hlawhtlinna nasa zawk neih belh zel turin duhsakna a hlan a. A hna thawhna chungchanga harsatna leh mamawh a neihte chu thuneitute hnenah inthlahrung lova thlen ṭhin tura chahin, a thawhna Centre tihchangtlunna leh thuam ṭhatna tur pawh theih tawpa an ngaihtuahpui tur thu a sawi.

Lunglei DC Office-in National Florence Nightingale Awardee lawmpuina hun an buatsaihah hian DC Office-a officer-te, SCMO, DIPRO leh Pi Lalenthangi Hnamte chhungte an tel a. Sub-Deputy Commissioner Pi Lalnunchhani Hnamte chuan hun a kaihruai a ni. 

Lunglei Senior Chief Medical Officer (SCMO) Dr Lalrinthangi chuan Lunglei District-a hriselna kawnga hma lakna hrang hrangah DC kaihhruaina leh ṭawiawmna avangin hmasawnna tam tak hmuh a nih thu leh an lawm thu sawiin, thawktute tiphur tura DC-in hna thawk ṭhate lawmman leh chawimawina an ruahmansak ṭhin te, Awardee lawmpuina hun an buatsaih te chu lawmawm an tih thu a sawi a. Health Department pawhin Pi Lalenthangi Hnamte hlawhtlinna chu an lawmpui thu leh an chhuan thu sawiin, a hna thawh ṭha tak takte a tar lang a. A thawhna Centre-in an ni tin hna bakah, tlawmngaih chhuah leh inpek ngaihna tam taka an thawh ṭhat thu te, hotute'n tih tur leh zawm tur an tih an kalpui ṭhat thu leh document hrang hrang ṭha taka an vawn ṭhin thu te tar langin, centre leh thawktu dang tan pawh entawn tlak tak an nih thu a sawi.

National Florence Nightingale Award 2026 dawngtu Pi Lalenthangi Hnamte chuan Award dawng tura dilna chungchanga buaipuitu Health Department official-te leh ṭhenrual ṭhate chungah lawm thu sawiin, Award dawng tura a kalna leh a dawn hnua ngaihsakna leh duhsakna a dawn avang te, Health Department hotute leh a thawhpuite, District thuneitute, pawl leh mimal lawmpuitu leh thilpek petute chungah te lawm thu a sawi a. Award dawng tura tehfung hrang hrangah hlawhtlinna an neih vek thu sawiin, damdawi ina nau nei zat tipung tura an thawh rimna leh hlawhtlinna te, hri danna pek kawnga an hlawhtlinna leh damlo thi mai tur nunna chhan him an neih ṭhenkhatte chu Award a dawn chhan langsar zual nia a hriat thu a sawi.

Pi Lalenthangi Hnamte hian International Nurses Day, May ni 12, 2026 khan National Florence Nightingale Award hi Rashtrapati Bhavan, New Delhi-ah India President Pi Droupadi Murmu kut aṭangin a dawng a. Mizoram aṭanga he chawimawina dawng thei 18-na a ni.

Pi Lalenthangi Hnamte hi Auxiliary Nurse Midwife (ANM) niin, kum 1999-ah health worker hna a thawk ṭan a. Siaha, Lawngtlai leh Lunglei District-a health sub-centre hrang hrangah thawk tawhin, kum 2017 aṭang khan Tuichawng AHWC-ah a thawk a. Tuichawng AHWC hnuaiah hian khaw 5 (Tuichawng 1, 2 & 3 leh Belpei 1 & 2) awmin, mihring 4,652 an awm.

Tuichawng AHWC-a Pi Lalenthangi Hnamte a thawh hnu hian damdawi ina nau nei (institutional delivery) chu 10% aṭangin 87%-ah kai chho tawhin, kum 2025–2026 chhung khan damdawi ina nau nei 78 lai an awm a. Hri danna pek kawngah pawh a ti ṭha ber pawl ni ṭhinin, damlo na zual leh thi mai tur nunna chhan eng emaw zat an nei tawh bawk a. Sikserh (malaria) dona leh venna kawngah pawh hlawhtlinna chhuanawm tak neiin, Tuichawng AHWC huam chhunga kum 2024-a malaria case 703 awm chu kum 2025-ah 158-ah a tla thla a, a tlak hniamna hi 78% a ni.