India General Elections 2014 atana inbuatsaihna kal chho zelah vawiin khan Election Commission of India chuan video conferencing hmangin hmarchhak state zawng zawnga CEO, DEO leh MCMC Member-te a kawm a. Lunglei District DC/DEO Pu Ashish Madhorao More hovin Lunglei District MCMC Member-te pawh he video conferencing-ah an tel ve a ni.

Vawiina video conferencing-ah hian ECI chuan politics rawngkai infakna leh thuchhuah chungchanga a phallo thil hrang hrang, MCMC kaltlanga endik tul te chu State Election Officials te an hrilhfiah a ni. MCMC Certification hi electronic media kaltlanga political party emaw an candidate-in an chhuah tur advertisement a nih chuan an chhuah tum ni hma ni 3 hma ngeiin (3 days prior to date of telecast) he certification hi an dil fel tur a ni a, mimal emaw non-registered pawl te an nih chuan a hma ni 7 hma ngeiin (7 days prior to date of teleecast) an dil fel tur a ni bawk. Print media-ah erawh chuan ‘paid news’ chi reng reng ngun taka vil tura hrilhin ECI chuan political advertisement reng reng te chu certification an neih hmasak a tul thu te, hetiang chi advertisement reng rengte chu candidate/party hriatpuinaa tih a nih leh nih loh te, internet/social media kaltlanga political advertisement ang chi reng reng pawh ngun taka vil turin a chah bawk. ‘Paid News’ hi Supreme Court chuan “electoral offence” ah a pawm a ni.

ECI hotute chuan nimin khan Internet Company/mediasites zawng zawngte hnenah lehkha thawn a nih tawh thu sawiin an company/website kaltlanga political advertisements chhuah turte chuan MCMC Certification an nei em tih enfiah hmasak tur a nih thu te, chutiang advertisement an chhuah tur manzat tur chu Commission hnenah an hriattir tur a nih thu te, political advertisement endik turin Company/website neitute chuan an mi leh sate zing atanga ruat turin leh anmahni kaltlanga political advertisement chhuah chungchanga sawiselna thehluh a nih chuan MCMC chuan ngun taka ngaihtuahin chu advertisement chu titawp turin thu a pe thei dawn bawk a ni. Candidate reng rengte chuan nomination an ziahluhin an e-mail leh social media chungchang kimchang taka tarlang turin phut an ni bawk a ni.

MCMC Certification nei lova political advertisement chi reng reng chhuah a nih chuan a tichhuaktu Cable TV/Network te chu an hmanrua zawng zawng hrensak (seize) theih a ni.

ECI hova video conferencing neih zawhah Mizoram CEO Pu Ashwini Kuar chuan District DEO leh Election kaihhnawih officials te a kawm zui nghal a. Mizoram sorkarin tun inthlan atana VVPAT 1500 a chah chu District tinah naktuk tuk lehah sem theih beisei a ni tih a sawi.