Vawiin tlai dar 3:00 khan Election Commission of India ruahmanna leh kaihhruaina hnuaiah hmarchhak state khawpui hrang hrang-a Media Certification & Monitoring Committee (MCMC) ten inthlanpui lo awm tura candidate leh political party ten campaign nana thu thar theh darhtu (media) an hmanna lo vil dan tur te leh MCMC mawhphurhna te video conference hmangin inhrilhfiah a ni a, hriatchian loh lai te zawhna te chu ECI lam atangin an rawn hrilhfiah nghal zel bawk a ni. Aizawl ah pawh he hun hi Returning Officer leh Aizawl D.C. ni bawk Pi Juhi Mukherjee, IAS, Chairman, District MCMC hovin DC Video Conference Room ah hman a ni.

Inthlanna atan hian inbuatsaihna tluang takin kalpui mek zel a ni a, naktukah hian Govt.H.S.S. ah leh Vanapa Hall ah inthlanna duty tur hrang hrang - Presiding Officers, First Polling Officers, Second leh Third Polling Officers ten training an nei dawn bawk a ni.