Naktuk ni 21 March hi World Forestry Day a ni a, he Ni pual hian Nature Trip, Tamdil-ah buatsaih a ni ang. He trip-ah hian School leh college zirlai 200 vel tel thei tura beisei a ni.
Environment & Forest Department chuan a hnuai mi ang hian World Forestry Day 2014 thuchah an siam.
'World Forestry Day hi khawvel ram hrang hranga vantlang miputen ramngaw humhalh pawimawhna leh ramngaw atanga kan mamawh hrang hrang kan hmuh tamzia kan hriat thar leh theih nan Kum 1971-a European Confederation of Agriculture-in General Assembly vawi 23-na in a rel angin Mrach 21 a hman thin a ni .
Ramngaw han tih hian kan mitthlaah thing tarn tak awmna hmun a lang nghal awm e. Mahse, thing ringawt ni lovin ramngaw chhunga awm zawng zawng a huam a ni. Ramngaw chu thil to chi tinreng, ramsa leh thil nung tinrengte chenna leh awmna a ni a, ramngaw hnuai leiah ramsa zangruh leh lu ruh nei lo te, hrik (bacteria) chi hrang hrang leh thil to zinga a mawl ber pawl (fungi) te cheng ve bawkin an mamawh an inphuhrutawn thin a ni. Ramngaw tel lo hian he kan chenna khawvela nunna nei chi tinrengte hi kan damkhawchhuak thei lo. Boruak thianghlim, mihringte mamawh, chak chi hrang hrang, daihlim, inhumhimna, inchawhharhna atana tha leh tui in tur (tui-hna) min petu a ni. Tin, tunlaia khawvelin a buaipui em em, sik leh sa inthlak danglam chak lutuk (climate change) tihziaawm nana hmanraw tha ber a ni bawk. Fimkhur lo leh pawisak nei lo taka thing kih hian kan sawi tak thing leh mau, ramsate inlaichinna a tichhe thin tih hriain mitin kan fimkhur a ngai a, ramngaw humhalh kawngah leh ramngaw siam belh zelna kawngah tha kan thawh theuh a tui a ni.
Forest Survey of India-in kum 2011-a report a siam thar berah chuan India ram zau tak, square kilometre nuai sawmthum pahnih singriat sangsarih zahnih sawmruk pathum (3,287,263 sq. km.)-ah hian ramngaw (forest cover) square kilometer nuairuk singkua sanghnih leh sawmhnih pasarih (692,027 sq. km.) a ni a; chutih laiin Mizoram square kilometer singhnih sangkhat leh sawmriat pakhat (21,081 sq. km.)-a zauvah hian ramngaw tha, Chhura rual han tih tur phei chu square kilometer za leh sawmthum pali (134 sq. km.) chauh kan nei a, chu chu kan state zau zawng atanga teha za zela pakhat pawh tling lo, 0.64% chauh anih avangin nakina kan tu leh faten min la dem loh nan ramngaw tichereu lo turin mitinin tan i la ang u. Ramngaw siam belh zel pawimawhzia hriain kan sorkar pawh hian Forest Department-ten ramngaw kan siam belhchhah nan leh eizawnna kawnga dinhmun tleu tawhten eizawnna an hmuh theihna turin mau chin hi NLUP peng pakhatah a telh hial a ni.
Kalphungah chuan thing pakhat kan kih chuan thing 10 tal phun thar tur anih laiin, tun kum 20 emaw kal taah khan zaa pakhat (1%) emaw chauh kan phun a ni. India rama thing leh mau, ramsate damkhawchhuahna hi kawng hrang hranga tihderthawn a ni mek a. Mahni hmakhua chauh ngaia ramngaw tihchereu leh tlangrama thing kih tarn lutuk hian leilung a tinghet lova, chu chuan lei chunglang luanraltirin hei hian ruah sur nasa lutuk leh tui lian a nghawng chhuak ve thung a ni. India ram ei leh bar zawnna (economy) hi Lo neih (agriculture)-ah a innghat thui hie tih kan hria a, leilung luang ral hian buh leh bal thar chhuahnaah thui takin kawngro a su bawk a ni.
Mizoram hi tlang ram anih avangin leilung luang ral venga ramngaw leh a chhunga cheng nungchate humhalh turin Mizo mipui zawng zawngte kan ngen a che u.'
