Vawiin chawhnu dar 02:00 khan Serchhip District Bawrhsap thar Dr. Franklin Laltinkhuma IAS chuan a vawi khatna atan Serchhip District chhunga Department Head-te ko khawmin meeting a neihpui a, inthlan lo awm tur atana hma lak zel dan tur te an thlir ho nghal a ni.

Dr. Franklin-a chuan department hrang hranga hotu lu rual lo kal khawmte chu khawtlang leh ram hmasawnna tur atana theihtawp chhuahpuiah a sawm a, Lok Sabha leh Hrangturzo Asembly bial bye election lo awm tur chu muanawm leh fel fai taka hlenchhuah a nih theih nan, fimkhur leh thahnem ngai taka thawk turin a chah hlawm a ni. Bawrhsap thar chuan tun tum inthlanah hian a vawikhatna atan VVPAT hman a nih ve dawn avangin official ten training an ngaih pawimawh a tul lehzual thu a sawi a, official-te chu chhuanlam siama election duty awl beisei lo turin a ngen nghal bawk a ni.

Hrangturzo Assembly Bial R.O. leh Serchhip District Election Officer ni bawk Dr. Franklin-a chuan tun inthlan lo awm turah hian Hrangturzo Assembly bial tan chauh Postal Ballot siam a nih tur thu leh Lok Sabha atan chuan bial khat vek kan nih avanga Election Duty Certificate (EDC) chauh siam a nih tur thu a sawi a, hei vang hian election duty-a kal zawng zawng ten vote an thlak vek theih nan mahni inngaihtuah a tul thu a sawi. He thilah hian Hrangturzo Assembly bial mi, hmun danga duty turte chuan a rang lama Postal Ballot an dil a ngai a, Lok Sabha seat atana vote thlak tur, election duty turte erawh chuan duty tur an ni tih an inhriat veleh driver-te pawh tiamin thuneitu te hnenah EDC hi dil vek turin a chah nghal bawk a ni.