588/2023-2024

Aizawl 26th May 2023 : Nimin khan Election Commission of India atanga lo kal Pu Dharmendra Sharma, Senior Election Commissioner leh a team-te chuan Mizoram inthlanpui lo awm tur chungchangah Chief Secretary, Director General of police leh Department hrang hranga Secretary-te chu Secretariat Conference Hall, MINECO-ah meeting neihpuiin inthlan felfai tak neih a nih theihna tura thil tulte an sawipui.

Pi Renu Sharma, Chief Secretary chuan ECI official-te chu Mizoramah a lo lawm tih a sawi a. Inthlanpui felfai tak neih a nih theih nan sawrkarin hma a la mek tih tarlangin ECI duhdan ang ngeia inthlan kalpui a nih tur thu a sawi a ni. ECI official-te chuan a hun takah Mizoram an rawn tlawh a ni tiin inthlanpui lo awm turah ECI duhdan leh ngaih pawimawhte tihlawhtling turin chak takin sawrkarin kut a thlak zel dawn tih ECI official-te chu a lo hrilh a. Mizoram chu india rama state ralmuang ber a ni tih sawiin, inthlan felfai takin neih a lo ni fo tawh thin a, kumina inthlanpui lo awm tur pawh felfai leh ralmuang takin neih a nih leh ngei a beisei thu a sawi a ni.

Pu Dharmendra Dharma chuan Election Commission of India-in a duh ber chu inthlanna felfai leh thianghlim tak neih a ni a, Polling station ralmuang taka siam leh tui thianghlim in tur leh inthiarna tha tak neih bakah rualbanlote tan pawha wheelchair hmanga awlsam taka vote an thlak theih nan a 'ramp' dah te, Covid Vaccine vawihnih la chauh duty tir, inthlanpui laia zu leh ruihhlo hluar thin tihbo bakah pawisa tam tak sem thin chu tihrem a ngaih thu a sawi a. Social media hmang sualna tam tak, a bik takin dawt hmanga inbeihna leh thudik lo thehdarh thin te man chhuah leh hrem te, Election Official-te zin veihvahna tur atana felfai taka ruahmanna siam te a ni a ti a. Pu Dharmendra Sharma chuan heng zawng zawng tihhlawhtlin a nih theih nan sawrkar Department Secretary-te chu hma la tura a duh thu a sawi rualin harsatna an neih chuan inthlahrung lova ECI hnenah hriattir turin a chah nghal a, a theihna apiangah ECI chuan a tanpui dawn tih a sawi bawk a ni.

Nimin meeting ah hian Pu Madhup Vyas, Chief Electoral Officer (CEO), Mizoram chuan inhmelhriat tirna hun neiin kalkhawmte hnena lawmthu sawina a nei nghal bawk a ni.

Election Commission of India atang hian Pu Dharmendra Sharma bakah Pu Nitesh Vyas (Sr.DEC), Pu Hirdesh Kumar (DEC), Pu R.K. Gupta (DEC), Senior Principal Secretaries, Under Secretary leh Director te an lo kal a ni.