587/2023-2024

Champhai, the 25th May, 2023: A bial chhung fangkuala Champhaia cham mek, Law & Judicial Minister Pu T.J. Lalnuntluanga chuan zanin dar 7:30 khan kum 2022-2023 Academic Session-a HSLC leh HSLC Examination-a pass tharte lawmpuina hun, Bethel Community Hall-a buatsaih chu khuallian niin a hmanpui.

Khuallian Pu T.J. Lalnuntluanga chuan zirtirtu, zirlai leh nu leh pate thawhrimna avanga Bethel venga zirlai thahnem takin HSLC leh HSSLC exam pass-a hlawhtlinna an chang chu lawmawm a tih thu sawiin, an puala chawimawina leh lawmpuina hun Bethel VC in an buatsaih chu fakawm a tih thu a sawi a. A bial chhunga zirlai pass-te lawmpui nan zirlaite tlawh chhuaka hun a hman chhoh mek thu tarlangin, thilpek lian tham lo tak a hlan chu bei tham angin lang mah se, thinlung taka a lawmpuina a ni tih hriatpuia pawmpui thiam zawk turin a ngen a. A bial chhung atanga Top Ten-a langphate Laptop a pek zel dawn thu a sawi bawk.

Champhaia zirna tih hmasawn kawnga tunhma atanga hmalakna hrang hrang neih tawh dante tarlangin, zirna tha leh zirtirna tha an dawn tawh avangin tunlai zirlaiteah beiseina sang tak a neih thu a sawi a. Zirlaite chu tawng thiam tum turte, mahni inrintawkna neia taimakna leh tumruhna nena lehkha zir turtein a fuih a. Zirna kawtchhuah a ding tan tir chauh an la nih avangin tun aia taima lehzuala bei tur leh, hlawhtlinna chang ngei tura tan la sauh sauh turin a fuih bawk a. Eng hna pawh thawk dawn se, thiam bel tur leh chhawrtlak ni tura inpuahchah tur te, tum bik neia lekha zir turtein a chah bawk.

Law & Judicial Minister chuan thangtharte zingah tum bik neia lehkha zir an awm tam ta zel chu lawmawm a tih thu pawh sawiin, ram leh hnam tan engtinnge ka tangkai ve theih ang tih rilru pu ran chunga lehkha zir a hun tawh a, hnam dang laka indahhniam bik mai lova, an tih theih aia nasa zawk kan ti thei tih inhriain theihtawp chhuah a pawimawh tawh takzet a ni, a ti a. Kalkhawmte chu rilruah tumruhna, huaisenna leh chungnunna nei turin a fuih a. Social media hman nasatin zirlaiteah nghawng thalo a thlen dan leh nih tum angte a nih loh tir phah dante tarlangin, zirlai puitu atan nilo thil dangah chuan social media hman chintawk nei turin a chah bawk a. Zirlaite chu Pathian tihna nena lehkha zir tura fuihin, an kalzelna turah duhsakna a hlan a ni.

He hun hi Bethel VC Member Pu K.Vanlalvulluaia, Education Sub-Commitee Chairman chuan kaihruaiin Rev Vanlalnghaka Jongte-in hunserh a hmang a. Tv Lalramdinpuia, Bethel VC Secretary-in kalkhawmte lawmna thu sawia report a pek hnuah Bethel VC Vice President Pu H.Lalduhawma kaihhruaiin lawmpuina thilpek sem chhuah a ni a. VC, mimal leh veng chhung NGO aiawhte'n lawmpuina leh fuihna thu an sawi bawk a. Pu K.Lalbiakhlira, Bethel VC Member-in lawmthu sawiin hun hman a khar a ni.

Law & Judicial Minister hova Champhai Bethel venga zirlai pass-te lawmpuina buatsaih kaltlang hian HSLC Exam pass 63 leh HSSLC Exam pass 37, an vaiin zirlai 100 te hnenah lawmpuina thilpek hlan a ni a. Distinction a pass-te Bethel Veng VC hmingin Momento leh lehkhabu pek an nih bakah, zirlai dang zawngte pawh lehkhabu pek an ni a. Law & Judicial Minister leh bialtu MLA Pu T.J. Lalnuntluanga'n zirlai pass zawng zawngte Dictionary a hlan vek bawk a. Heng bakah hian abik taka lawmpui nan HSLC Exam 2023 a Mizoram puma palina dinhmun hauhtu Esther Tingbiakmuani D/o ZL Thanga, Bethel Veng (Bethel Mission School) hnenah khuallian Pu T.J. Lalnuntluanga, bialtu MLA ni bawkin Laptop a pe a, Bethel VC in lawmpuina thilpek an hlan bawk.

Attachment

  • Loading attachment...