586/2023-2024
Dated Aizawl the 25th May, 2023 : Vawiin khan State Insurance meeting Hotel Regency Conference Hall, Aizawl-ah neih a ni.
He State Insurance meeting, Hotel Regency a neihah hian Mizoram sawrkar aiawha tel LESDE Secretary, Pu Lalramsanga IRS chuan thu sawiin Mizoram-ah insurance policy la an la tlem hle a ni a ti a, insurance policy la kan pun theihna turin a tam thei ang bera inhrilhhriat a pawimawh a ni, a ti. Insurance policy thehdarh na kawngah pawh a tam thei ang bera Mizo ṭawng hman a pawimawh thu a sawi a, insurance lak dan leh a claim dan te chu awlsam zawk, mipuite ina an hriatthiam theih leh an rin ngam tura kan siam a pawimawh a ni, a ti bawk. Mipuiten a tam zawk a insurance kan lak theih nan insurance company te chu a ṭul anga hmalakpui turin Mizoram Sawrkar chu a inhuam reng a ni, a ti.
Pu Gautam Kumar, IRDAI aiawh pawhin thu sawiin, IRDAI chuan hmachhawp a nei a, chu chu kum 2047 ral hma a India mipui ten Insurance policy an neih vek hi a ni, a ti a. Mizoram chu India rama ziak leh chhiar thiam tam ber pawl state ni mah se Insurance policy nei tlem an la ni chu a pawi a tih thu a sawi a, insurance lamah nasa zawk a inhrilhhriat (awareness) a pawimawh takzet a ni, a ti.
Mizoram-a insurance policy la an pun zel theih nan hmachhawp chi hrang hrang neih mek te pawh tarlan a ni a, chung zinga pawimawh zualte chu Mizo ṭawng a insurance kaihhnawih video siam leh social media hmanga digital campaign neih te a ni. Tata AIA hian thingtlang lam mi ten insurance cover an neih theih nan a pawimawh tak, Rural Outreach through Common Service Centers tih an kalpui mek bawk a. Tunah hian village level entrepreneurs 50 he CSC kaltlang hian TATA AIA hian a puihbawmna a pe mek a ni. Heng hmalakna hrang hrang hmanga insurance la an lo pun chuan Mizoram mipuite tan chhiattawh thulhah lukhawng an neih phah anga, staff te pawh thahnem tak lak an ngaih avangin mi tamtak in hna an lo neih phah dawn bawk a ni tih State insurance Meeting ah hian tarlan a ni bawk.
He State Insurance meeting hi Insurance Regulatory and Development Authority of India in hmachhawp a kalpui mek 'Insurance for all by 2047' tihhlawhtlinna program pakhat a ni a, Mizoram a insurance la an lo pun zel theih nan Insurance company hrang hrang TATA AIA Life Insurance, IFFCO-Tokyo General Insurance leh insurance company engemaw zah an kalkhawm a ni.
Attachment
- Loading attachment...
