585/2023-2024

Kolasib dated 25th May 2023: Vawiin chawhnu khan HT High School, Ṭumpui veng, Kolasibten HSLC Exam 2023-a 96.42 % pass an neih lawmna an buatsaih a. Minister Pu K.Lalrinliana chuan khuallian niin a hmanpui a, Pi F.Lalrinmawii, Chairperson, School Managing Committee chuan hun a kaihruai a ni.

Minister Pu K.Lalrinliana chuan taimakna leh invawnna kawnga pa entawntlak tak Pu H.Thanseia hming chawi a School din, HT High School-in High School Leaving Certificate Examination 2023-a result duhawm tak an nei chu lawmawm a tih thu sawiin zirtirtu, zirlai leh zirlai nu leh pate inpekna fakawm a tih thu a sawi. Exam a hlawtlinna chang ve lote chu hlawtlinna sang zawk chang turin beiseina thar nen bul ṭha taka ṭan chhunzawm turin a chah a, mi beidawng duh lote hi mi rintlak leh malsawmna dawngtu an nih ṭhin thu a sawi. Zirna chu nun kaihruaitu pawimawh tak a nih avangin eizawnna kawng engpawh zawh dawn mah ila zirna ngaih pawimawh hmasak a ṭul thu Minister chuan a sawi a, mahni intodelhna tur chuan eng hna pawh thawh hreh lo turin zirlaite a fuih bawk a ni. Zirna chu eizawnna ngelnghet neih nana thil pawimawh tak a nih bak ah kan khawtlang leh ram tan a thiamna hmantlak leh ṭangkai zir chhuah nan hmang turin Minister chuan zirlaite a chah a, zirna sang zawk an zir chhunzawmna tur ah thiamna hmantlak an neih theih nan uluk takin ruahmanna siam ṭhin turin a chah bawk a ni. School sak chhunzawmna turin Minister Pu K.Lalrinliana chuan cheng nuai 7 a ruahman sak tur thu a sawi a, zirlai exam a hlawtlinna changte hnen ah lawmpuina thilpek a hlan bawk a ni.

Pu Lalṭhafala, Headmaster, HT High School chuan kum 1996-ah khawtlang hruaitute leh tlawmngai pawl hrang hrang hmalaknain HT Comprehensive School din a nih dan te leh kum 2011 aṭangin High School anga kalpui a nih dan te a tarlang a. Kum 2003-ah Lump sum Grand in Aid a hlankai a nih hnu ah Ad hoc dinhmun a dah leh an nih dan te, school building sak chhunzawm hna kalpui a nih dan te leh zirlai an ṭhathnem avang a harsatna an neih ṭhin thute a sawi bawk a ni. School Managing Board, Khawtlang hruaitute leh zirlai nu leh pate ṭhahnemngaihna leh inpeknaah Pu Lalṭhafala chuan lawmthu a sawi a, HSLC Exam beitu zirlai 28 ah za zel a 96.42 ten hlawhtlinna an chan thu a tarlang bawk a ni.

Attachment

  • Loading attachment...