584/2023-2024

Champhai, the 25th May, 2023: Vawiin khan Education Training Hall Champhaiah Children's Science Congress - 2023 neih tur inbuatsaihna, District Level Sensitization Workshop buatsaih a ni a, he hun hi Pu C.Lalbiakzauva, DEO & DPC Samagra Shiksha, Champhai District chuan a hmanpui.

Pu C.Lalbiakzauva, DEO & DPC Samagra Shiksha, Champhai District chuan Children's Science Congress-ah District hrang hrangte'n inelna hautak tak an hmachhawn thin thu sawiin, District huap inelna neih huna result duhawm tak neih a nih theih nan Zirtirtu kalkhawmte chu anmahni School theuha naupangte hmasawnna tur kawng ngaihtuah tur leh, District tana hmasawnna thlen tuma theihtawp chhuah theuh turin a chah a. Sawrkar hnathawk zawng zawngte chu dan pakhatin a phuar thu sawiin, kalkhawmte chu dan piahlama khawsa lo turin a chah a, hremna talhfiak lek loh hram tura danin a phalsak chinah awm tum hram turin a chah a ni.

Zirtirtute chu zirna tithuanawp thei laka fimkhur tur leh, Zirlai naupangte tana theihtawp chhuah turin a fuih a. District Level-a School intihsiakna awm apiangah tel zel turin a chah a, heng intihsiakna a tel lo school-te hian intihsiaknaa tel thinte hmasawnna kawngah an phak lo thin a ni, a ti a. School intihsiaknaah private school-te'n theihtawp an chhuah laia sawrkar school zawk tel lo an awm fo thin chu tha lo a tih thu sawiin, kumin intihsiaknaah chuan tel kim vek turin a ngen a. Children's Science Congress neih tura tel vek turin Zirtirtu kalkhawmte a sawm a ni.

He hun hi Education Training Hall, Champhai Kahrawt Vengah buatsaih niin, Pu H.Lalhminghlua, Addl. DPC, Champhai District chuan a kaihruai a, Pi R.Lalnunpuii, Academic Coordinator, Champhai District hnen atangin report ngaihthlak a ni.

He hun ah hian Dr. Laldinpuia, Associate Professor, Centre for Disaster Management, Mizoram University, Aizawl chu Resource Person atan hman niin a hnen atangin a lem nena entir Children's Science Congress chungchanga hriat tur pawimawh tak tak ngaihthlak a ni.