583/2023-2024

Aizawl 25th May 2023 : Vawiin khan Election Commission of India atanga lo kal Pu Dharmendra Sharma, Senior Election Commissioner leh a team-te chuan Mizoram inthlanpui lo awm tura inbuatsaihna hrang hrangte endikna Secretariat Conference Hall, MINECO-ah an nei a, he hunah hian District 11 atangin District Election Officer (DEO) leh Superintendent of Police (SP) te an tel a ni.

Pu Dharmendra Dharma chuan Election Commission of India-in a duh ber chu inthlanna felfai leh thianghlim tak neih a nih thu a sawi a. Vote nei zawng zawngte vote thlak tura fuih bakah ralmuang taka mipuiten vote an thlak theih nana Dan kenkawh kawnga hmalakte chu pawimawh hmasa a ni a ti a. EVM hmantlak chauh hmang tur leh Polling station zawng zawngten vote thlakna tura tul (facilities) an neih te, sum leh pai uchuak taka hman anih loh nana hmalak a ngaih thu a sawi a. Mizoram chuan inthlanna felfai tak a neih thin thu sawiin, India rama state ralmuang ber a nih ang takin inthlanpui lo awm tur poh thianghlim, felfai leh ralmuang  tak neih a nih theih nan a hmala turin District Election Officer leh Superintendent of Police-te chu a chah a ni.
 
District 11 zingah district  panga DEO te chuan  presentation tawi, kum 2018 inthlanpui-a anmahni District dinhmun tlangpui (statistics) leh kumin inthlanpui lo awm tur a an hmalakna hrang hrang leh harsatna an neih te sawifiahna an nei a. ECI lam chuan tanpui an ngaihna laiah tanpui an tum thu an sawi rualin an duhkhawp lohna lai leh hmalak ngai laite DEO-te hi an lo hrilh a ni. Inthlanpui felfai tak neih a nih theih nan District tin a DEO leh SP-ten Election Manual and Instructions chu ECI website-ah en fo turin an chah nghal a ni.District paruk te hian naktuk ah presentation pekna hi an nei leh dawn a ni.

Election Commission of India atang hian Pu Dharmendra Sharma bakah Pu Nitesh Vyas (Sr.DEC), Pu Hirdesh Kumar (DEC), Pu R.K. Gupta (DEC) bakah Senior Principal Secretaries, Under Secretary leh Director te an lo kal a ni.

Attachment

  • Loading attachment...