583/2023-2024

Vawiin khan School Education Minister Pu Lalchhandama Ralte chuan a bial chhung khaw thenkhata raltlante a tlawh a, anmahni tanpuia chhawmdawl turin Mizoram sorkar a inhawng tih a hrilh.

Pu Lalchhandama Ralte chuan Manipur buai avanga raltlan Tuivawl bial chhung Sakawrdai leh Khawpuar a awm te a tlawh a, Sakawrdai raltlante camp-ah thusawiin Minister chuan a bial chhungah hian raltlan 1200 chuang an awm tih sawiin a tam zawkin an chhungte an bel a, camp a awm ngai engemawzat an awm avangin heng mite tan hian khawsakna tur camp sak a ni a, raltlante camp lian ber chu Sakawrdaiah hian sak a ni a ti. Khaw hrang hrangah khawtlang hruaitute, tlawmngai pawlte leh kohhranten an lo kuangkuah chu lawmawm a tih thu a sawi a, sorkar pawhin a theih ang angin chhawmdawl hna a thawk zel a ni a ti.

Minister chuan raltlan naupang sikul lut rual lehkha zir si loten a rilru an ti na tih sawiin heng mite hian sikul an luh theih nan sorkarin thuchhuah a siam a ni a ti a. Anmahni luh theihna class-ah raltlan naupang, sikul kal duh te chu sorkar sikulah an lut thei tih a hrilh a, sikul lut duh apiangte chu inthlahrung lova lut zel turin a chah bawk.

Minister chuan Relief camp chu a nuam thei lo tih sawiin khawtlang hruaitute nen a tul ang ang an ruahman zel dawn tih a sawi a, hnathawk thei rualte chuan VC te berawn chunga a theih ang anga an mamawh tuak nan hna thawk turin a chah a ni.

Minister chuan raltlante chu harsatna an neih pawhin sorkar chu an tan a inhawng reng tih a sawi a, Manipur nen state ramriin dang mah se, Mizoram chu an ram a ni tih hria a, mikhual rilru pu lo turin a chah a, tanpui nan Rs 20,000/- (Singhnih) a hlan a ni.

Pu Sangthankhuma, Sakawrdai VCP chuan raltlante tawm hulna tur an sak dan a report a, khaw thenawm a mite pawh an rawn tlankhawm theih nan an khawsakna tur in pahnih an sa tih a sawi a, in an sak te hi 80x18 ft leh 80x16 ft a zau a ni a, a tul chuan la sak belh zel theih a ni tih a sawi. Raltlante mamawh lei nan pawl leh kohhranin Rs 87,000/- an thawhkhawm tawh niin a sawi bawk.

Sakawrdai camp ah hian mi 73 an khawsa mek a, Vaitin YMA hall-ah mi 12 an khawsa mek a. Manipur sorkarin raltlanten an rauhsan an chenna inte chu luahtu an awm loh chuan an chân dawn tih a sawi avangin tam tak chu an let leh a ni.

Minister-in raltlante a tlawh kualnaah hian khawtlang hruaitute leh Sinlung Hills Council Executive Member ?henkhatten Minister hi an tawiawm a ni.

Attachment

  • Loading attachment...