720/2026-2027

Aizawl; 26th May,2026: Vawiin chawhnu khan DC Pisa Pui Hall-ah Election Commission of India (ECI) Secretary Pu Binod Kumar hovin Aizawl District DEO, EROs,AEROs,Supervisers leh BLO ten meeting an nei a Pu Binod Kumar chuan SIR kalpui tura in inpauhchahna te leh hma in lo lak tawh chin te hriat bakah, in hriatchian loh awm te, harsatna in nei te ngaihthlak a,ka ngaih pawimawh thurawn te pe tur che u a, vawiin meeting hi koh ka ni tiin, thurawn pawimawh tak tak SIR official kalkhawm te a hrilh hlawm a ni. Pu Binod Kumar chuan Electoral Roll felfai leh thianghlim neih nan a SIR (Special Intensive Revision) 2026 hi kalpui a ni a. Rampum nghawng pha thil a nih avangin a buaipuitu ten taima tak leh felfai taka in buaipui hi ECI chuan a beisei tlat a. ERO leh BLO te chu SIR kalpui tura dan leh dun awmte hre bel hle tur leh theitawp chhuah an duty hlen turin a chah hlawm a, enumeration form chu ni 5 chhunga semfel hman tum turin a chah a, duhsakna a hlan a ni.

Vawiin meeting-ah hian Aizawl District Election Officer Er.Lalhriatpuia’n SIR (Special Intensive Revision) kalpui tura Aizawl District inpuahchahna leh hma lo lak tawh chin PPT hmangin a entir a.

Aizawl District hnuaiah hian Assembly Constituency 12 awmin, Polling Station 324 a awm mek a. Rationalization hnuah chuan 359 awm tura beisei a ni. Voters 2,92,635 awmin, Mipa voters-1,36,654 leh hmeichhe voters-1,55,981 an awm mek a, Kum 2005 a voters awm zat chu 1,33,658 a ni thung. Electors mapped tawh hi 2,18,623 niin; chu chu 74.71% a ni. Enumeration form hi 5,85,270 print tawh a ni bawk.

Pu Binod Kumar hian DC Pisa Pui Hall-a meeting a neih zawh hnu hian Gov’t. Middle School, Zemabawk west a Polling station a tlawh nghal a ni.

Vawiin meeting-ah hian Pu Binod Kumar hi Pu Vijay Gupta, Section Officer, ECI in a tawiawm a ni.