Vawiin khan Chief Minister Pu Lal Thanhawla chuan Thenzawl khua a tlawh a. Mizoram Upa Pawl(MUP) Thenzawl Area  te hun a  hmanpuina Thenzawl MUP Area Upa Runah thusawiin,   "Khawthlir thui tak neilo ten pipute sulhnu hlu tak tak chei danglam an tum thin chu a khaw mipuiten an dodal a ngai tawh a ni", a ti.

Chief Minister Pu Lal Thanhawla chuan Thenzawl awmna chu ramlaili a nih avangin hmalam thui tak thlir chungin sawrkarin nasa takin a chei chho mek a; Thenzawl mipui te tan chauh ni lo Mizoram pumpuiin a chhawr tur hmunhma te siam mek a ni a ti a. Hei vang hian Thenzawl mipuite chuan kawng tinrengah changkan an tum mai bakah midangte pawh rilru inhawng tak a lo dawngsawng thei zel turin an rilru put hmangah te  siam that ngailai a awm a nih chuan an siamthat zel a ngai a ni a ti. 

Thenzawl ramchhung a Chawngchilhi Puk, Tuirihiau leh Vantawng Khawhthla te chu Mizoram hmun dang a Pipute sulhlu hlu tak tak zing a mi; Eco-Tourism, Prime Minister pawhin kan hmalam hun nia a sawi atan a tangkai, khualzinmite hipna tur tha tak tak vek an ni a ti a. Chief Minister chuan, "Department thenkhat, sum siam tum ten Pipute sulhlu hlu tak tak pipute hun laia an hmanraw hman pawh ni lo hmanga an chei chhe chiam zel hi thil vanduaithlak tak a ni a; a khawchhung mipui ten in dodal tur a ni a, an tihchhiatsak che u in phal tur a ni lo", a ti a. "Phai lamah te leh khawvel ramchangkang zawkah te thilsiamchhuahna kaihhnawih in boruak a ti chhe nasa tawh a. Chutianga khawsa te chuan Mizoram hi an rawn tinzawn chho mek zel a; boruak thianghlim an duh bakah kan pipute sulhlu hi a nih ang angin an hmu chak a. Step te, building te leh kawng kan lo siam chawp a kal hi an beisei lo, Chawngchilhi kha step-ah a kal lo tih an chiang, Thasiama sial pawh step-ah a chhoh a rinawm lo", tiin Mizoram a khualzinmite hip thei tur hmun hmingthangte vawnhim zel a tul thu a sawi a ni.

Chief Minister chuan khawtlang mipui leh hruaituten ram awl an vawn that zel a tul thu sawiin hmasawnna ruhrel dinna tur pawh ramruak, pawisa a lei ngailo zel beisei a ni tawh a ti. Mizoram mipuite chuan thilsiam dangte hnena Chanchintha hril nachang an hre tan chu thillawmawm tak a nih thu sawiin Ramngaw leh Nungcha humhalh kawnga YMA hmalakna te pawh A Siamtu lawmzawng a nih a rin thu a sawi a ni. Ramngaw leh Nungcha humhalh bakah Mizo tawng humhalh a tul tih a sawi. Thangthar ten Mizotawng, khawvel a tawng mawi ber zinga mi an ti chhe mek zel chu thil thalo tak a nih a vangin a siam that hna thawk a rawn pen chhuak turin MUP chuan mawhphurhna pawimawh tak an nei a ni a ti.