Vawiin chawhnu khan State Task Force Committee for Immunization (STFI) chuan an chairman Health & Family Welfare Secretary Pu Lalrinliana Fanai, IAS hovin a pisa-ah Measles-Rubella Campaign chungchang an rel.

Health & Family Welfare Secretary Pu Lalrinliana Fanai, IAS chuan kalkhawmte lawmna thu sawiin Mizorama Measles-Rubella Campaign hlawhtlinna tur chuan department hrang hrang thawhho that a tul thu leh inhrilhhriatna neih a pawimawh thu a sawi a.

NPSP-WHO Surveillance Medical Officer Dr. Lalhlimpuii chuan measles (sentut) leh rubella (german sentut) natnate chu lanchhuah dan inang tak a nih thu a sawi a. Kum 2010 atang khan India ramah measles natna en thlithlaina (surveillance) neih tan a ni, a ti a. Routine Immunization a measles vaccine chiah pek thin chu measles-rubella vaccine in thlak a nih tawh tur thu a sawi a. Measles - Rubella Campaign kalpui dan tur leh department hrang hrang tihtur te a tarlang bawk a ni.

State Immunization Officer Dr. Lalzawmi chuan Intensified Mission Indradanush (IMI) 1^st- 3^rd Round thlirletna neiin harsatna hrang hrang a sawi a. Measles Rubella Campaign kalpui tura inpuahchahna a tarlang a. Mizoramah chuan Campaign hian nausen thla 9 atanga naupang kum 15 inkar mi nuaih thum (3) chuang a huam tur thu a sawi bawk a ni. 

Measles-Rubella Campaign hi January 2018 atanga tan tur niin December 2019-ah chuan vaccine latu tur za a sawmkua-in la tawh tura ruahmanna siam a ni a. Sawrkar Laipui chuan kum 2020-ah measles (sen tut) um bo leh rubella (german sentut) khuahkhirh hman a tum a. Measles-Rubella (MR) Campaign hian a tum ber chu he natna laka naupang ven niin naupang a tam thei ang ber MR vaccine pek tum a ni. Measles-Rubella (MR) Campaign hi state zawng zawng ah kalpui tur niin nausen thla 9 atanga naupang kum 15 inkar a huam dawn a ni. 

Meeting-ah hian Health & Family Welfare Department, National Health Mission, Health Services Department, Social Welfare Department, School Education Department, Information & Public Relations Department, State Immunization Officer, Indian Medical Association (IMA), Indian Academy of Paediatrics (IAP), MHIP, Hospital & Medical Education Department, Lai, Chakma leh Mara Autonomous District Council atangin an tel a ni.