Vawiin chawhma dar 10 khan Economics & Statistics Department buatsaihin DC Meeting Room Serchhipah ‘One Day Workshop’ neih a ni. 

He hun kaihruaitu Pu Lalchhuanawma Hrahsel, MPESS, Director of Economics & Statistics chuan an inhmuhkhawm chhan bulpui ber chu District Planning Committee hma lakna atana inbuatsaihna a ni a ti a, District Profile buatsaih dante pawh uluk taka an zir tur thu a sawi.  District hrang hrang 5-a District Research Office hawn tharte chu thawktu lamah indaihlo hle mahse District tana an pawimawhna hre chiang turin a chah a, mi hriat loh leh neih lohte kan neih a tul fo thin, chu chuan midang tan tangkaina leh awlsamna tam tak a thlen thin a, chumi atan chuan inbuatsaihna tha tak kan neih hi a tul ani a ti bawk. Sawrkar Department dangte nen thawh hona tha tak kan neih a tul a, mipuite tana chhawr nahawm tak ni thei tura inbuatsaih turin a chah a ni. 

Pu Lalrikhuma Sailo, MPESS, Adviser-cum-Joint Secretary, Planning & Programme Implementation Department (Research & Development Branch) chuan District Planning Committee (DPC) hma lak nana ‘District Planning Process’ chungchangah zirtirna a pe a. Pu B. Lalrinhlua, MPESS, Research Officer, Directorate of Economics & Statistics chuan ‘District Profile’ buatsaih dan tur leh ‘Fiscal Variables & Indicators’ chungchangah zirtirna a pe a ni. Pu Malsawmdawngliana, Inspector of Statistics, Directorate of Economics & Statistics chuan ‘Farm Harvest Price Data’ chungchangah zirtirna a pe bawk a ni. 

He workshop ah hian District hrang hranga District Research Officerte leh staff te an tel tha hle a, sawi hona tha neih a ni bawk.