Vawiin chawhma dar 10:00 khan Champhai Venglai Community Hall-ah Economics & Statistics Department, Mizoram buatsaihin Champhai District huam chhunga khawtin leh veng tin VC te kal tlanga thlan Enumerators ten survey an neih tur atan training an nei.
India Sawrkarin a ngaih pawimawh em em State tinte thawhehhuah leh sum lakluh (State Domestics Income) chhutchhuah nan thil tul- Dan hmanga sumdawng tute leh thil dang atana in register te dinhmun (Business Register) buatsaih nan te, Local council/Village council te sum thawhehhuah leh lakluh chhinchhiahna (Local Bodies Account) buatsaih nan leh kuthnathawktu te dinhmun (Farm Activity Data) atante he survey hi Mizoram khawtin leh veng tinah neih tur a ni a. Hemi atan hian Sawrkar pawhin Finance Commission 13-na hnuaiah sum a ruahman a ni.
Pu Lalrinkhuma Sailo, Joint Director Economics & Statistics chuan he training hawnna thu sawiin Enumerators kalkhawmte chu anmahni khua/venga V.C ten mi rintlaka an ngaihte an nih ang taka rinawm leh dik taka survey hna thawk turin a chah a. An thil lak khawm(Primary Data) a dik loh chuan Mizoram pum dinhmun khaikhawmna a dik dawn loh avangin thil pawi tak a thlen thei a ni a ti a. State Domestic Income hi finance Department pawhin Planning Commission Annual Plan sum a bithliah theih nana Resource Forecast buatsaih nan behchhanah a hman avangin kalkhawmte chu fimkhur taka survey nei tura ngenin Enumerators te chu khawtin leh veng tina Economics & Statistics department aiawha awm an nih avangin thildangah pawh tangkai taka la hman chhunzawm zel an ni dawn a. Kum nga dana neih thin Economic Survey March-June, 2013 chhunga neih tur atan te, veng leh khua zawng zawng dinhmun dik tak hriatchianna atana Baseline Survey neih leh tur atan te pawh heng Enumerators te hi la hman chhunzawm zel tur an nih thu a sawi.
Pu Lalrinkhuma chuan survey hi mimal intih mualphona tur lam nilovin ram leh hnam hmasawnna tur atana thil tul leh pawimawh anih avangin mipuite pawh Enumerators te an ina an lokal huna tha taka lo dawngsawnga, an thil hriat duh ang apiang zep nei lova tha taka lo tawiawm turin a ngen a, sawrkar hmasawnna ruhrel ruahmanna (Plan & Estimates) siam nan statistics rintlak neih a pawimawh tih hriain statistics district office la awm lohna district panga tun sawrkar kum nga chhunga hawn tur zingah Champhai pawh a tel ve thu a sawi bawk.
He Training rawn neih pui tur hian Directorate of Economics & Statistics atangin Pu Lalrinkhuma Sailo, Jt. Director bakah hian midang pali an lokal a, vawiin training ah hian Champhai District khua leh veng tina Enumerator te an kal tha hle.
