2260/2023-2024

Aizawl 10th October, 2023 : Economics & Statistics chuan an kum 50-na, Golden Jubilee an lawm mek a, a lawmna pui ber hi vawiin October 10, 2023 (Thawhlehni) hian Directorate of Economics & Statistics Conference Hall, MINECO-ah hman a ni a. Dr. Renu Sharma, IAS, Mizoram Chief Secretary chuan khuallian niin he hun hi a hmanpui.

Khuallian Dr. Renu Sharma chuan Directorate of Economics & Statistics kum 50-na an hmang thei chu a lawmpui a, Department hi Statistics leh a kaihhnawih zawng zawngah NODAL AGENCY an nih avangin tan la zel turin thawktute a fuih a. Department-in Theme-a an hman lai "ONE STATE ONE STATISTICS" chu a pawimawh hle a, State-in data dik kan neih zel theih nan a hun tak, rintlak, dik bawk si kan neih theih nan Department -a thawktute mai bakah Sawrkar Department dang zawng zawngte, Tlawmngai pawl leh pawl dangte Statistics tha kan neih theih nana tan la theuh turin a sawm a, kan vaia ram tana kan thawhho a ngaih thu sawiin Statistics tha chuan hmasawn nana ruahmanna (Developmental planning) atan leh hmalam atana Policy siam nante a pui nasa em em a, data tha leh dik telloin hmasawnna hian kawng dik a zawh mumal thei lo hial ang a ti.

Khuallian hian Jubilee hriatrengna lungphun a hawng a, Photo Gallery-a thlalak hlui leh, Office khawl hman thin thenkhatte enhona hun neih anih bakah Statistical Handbook Mizoram, 2022 leh Meteorological Data of Mizoram, 2022 chu a tlangzarh nghal bawk.

He hunah hian Director kal chhuakte leh programme hmang tura sawm te hnenah memento hlan an ni a. Director chatuan ram pantate sunna hun hman a ni bawk.

Economics & Statistics hi kum 1973, March ni 1-ah office hran, enkawltu hran neiin, chuta tang chuan hmalam panin a kal zel a. State chhunga Official Statistics leh data te vawng thatu an ni a. Kum 2008, August 19 atang phei chuan State chhunga Statistics leh a kaihhnawih hna reng rengah NODAL AGENCY atan Directorate of Economics & Statistics hi Mizoram Sawrkar chuan a puang ta a ni.

Golden Jubilee lawmna hi chi hrang hrangin kalpui a ni a, Consultative Meeting, Cyclothon bakah Workshop Programme te lo hman tawh a ni.

Jubilee lawmna programme hi Pu Lalmalsawma Pachuau, IRS, Secretary to the Government of Mizoram, Planning & Programme Implementation Department chuan kaihruaiin Jubilee lawmnaa lokalte hnenah lawmna thu a sawi a. Pi B. Vanlalruati, Deputy Director chuan “One State One Statistics – Its Relevance & Way Ahead’ tih thupuia hmangin presentation a pe a. Pu B. Lalrinhlua, Director, Economics & Statistics chuan lawmthu sawina hun a hmang bawk.

Programme zawhah hian Jubilee lawmna ruai kilho nghal a ni