Vawiin khan Govt Mamit College-ah Entrepreneurship Development Centre (EDC) Mizoram hnuaiah Innovative Challenge on Sustainable Business Solution to Development chungchang nihnih awh training neih a ni a. Dr. Lalrozama, IAS District Bawrhsap chuan training khuhhawnna hun a hmang.

Dr. Lalrozama chuan ramin hmasawnna tluantling a neih theih nan EDC chuan Sustainable Development Goals (SDGS) 17 a duang a. Hei hian a tum chu kum 2030-ah chuan mimalin eizawnna ngialnghet neihtir a ni a ti. Hmasawnna tluantling leh a tak tak nei tur chuan mahni ngeiin kan sualchhuah a tul telh telh dawn a, taihmak, tih takzeta beih leh kan thil tuma kan chian a tul a ni. Thalaite kan rilru kawng hrang hranga kan la hman theih lai hmang tangkaiin kan ram, kan Society tana training hi hmang tangkaia chhawr ngei tum turin zirlai naupangte a chah a ni.

District Bawrhsap chuan zirlaite'n ngaihtuahna tak tak seng a, a tira dream len vak aiin tumruhna tak tak nena hlawhtlinpui tur duanchhuah chu a tul zawk thu a sawi bawk.

Pi Saidingpuii, EDC. Project Assistant chuan Entrepreneurship Development Centre Mizoram-in a tum tarlangin ngaihtuahna thar hmanga harsatna sutkian a nih thu leh Thalaite Sawrkara innghat lova, mahni intodelhtir a nih thu a sawi a. EDC hnuaia thalai eizawnna kawng daptute tanpuina leh khaichhuahna tura Fund awm theih dan leh mahni kutkawih ngeia eizawnna kawng zawh tum tak takte tan intihsiakna hmanga thlan an nih thin thu a sawi bawk. EDC hnuaiah a thlawna inchhawmdawlna a awm lova, ngaihtuahna thar hmanga eizawnna ngialnghet din tumtute tan erawh kawng zau taka a inhawn thu a tarlang a ni.

EDC hnuaia nihnih chhung training-ah hian Resource Persons Lalhruaitluanga, Master Trainer &ZRSC, Saidingpuii, EDC. Project Assistant,  KSH Birlal Singh, Associate Professor leh Vanlalmawia, Master Trainer & Associate Professor, Hom Kumari, SBI, Joseph Rosailova, Apex Bank,  te'n zirtirna an pe a ni.

Training hi Pu M.S. Dawngliana, Hnamte, Principal, Gov't Mamit College chuan kaihruaiin, Zirlai naupangte tan an harsatna sawichhuahna hun neih anih bakah Team insiamin practical training neihpui an ni bawk.