Vawiin chawhma khan Ministry of Development of North Eastern Region (DoNER) Union Secretary Dr. Inder Jit Singh chuan ITI Venga Urban Health Centre a tlawh a, hemi hmuna hnathawk te mamawh leh Centre hmun hma en fiahna hun a  nei nghal a ni.

Union Secretary Dr. Inder Jit Singh chuan Statistic atanga en in Mizoram in hriselna kawngah harsatna lian tak tak a tawh te zingah Tuberculosis (TB), Cancer leh HIV te hi an ni, a ti a. TB, Cancer, a bikin HIV darh zau zelah Mizoram sawrkar chuan hma a lak nasat leh zual a ngai a ni, a ti a. Sawrkar bakah  NGOs leh kohhran ang te pawhin hma la zelturin duhsakna a hlan bawk a ni. Union Secretary chuan DoNER chuan hmasawnna ruhrel (infrastructure) lamah hma a la thei a, amaherawh chu state sawrkar in DoNER hmalakna te a tawiawm loh chuan, sum sen khawhralna a ni, a ti bawk a ni. 

Union Secretary chuan ITI Veng a Urban Health Centre in a mamawh te proposal thlakhat chhunga DoNER a lo thlen chuan a rang thei ang bera hma a lo lak tur thu a sawi bawk a ni.

Urban Health Centre, ITI Veng hi 24/7 a in hawng a, OPD Dar 9AM-4PM thleng hawn a ni thung a, IPD leh khum 11 dah a ni bawk a ni. Nau neihna room, laboratory te a awm bawk a ni. Nitin OPD ah hian mi 40 atanga 50 inentir an awm tlangpui a, doctor 1, pharmacist 1, staff nurse 3, lab technician 2, accounts clerk 1, health worker 2 leh helper 3 thawk mek an awm a ni. Kum 2018-2019  khan National Quality Assurance Certification a dawng a, hemi kum vek hian Most Beautiful Award pawh Kayakalp hnuaiah a dawng tawh bawk a ni.

Hemi zawhah hian MINECO-a DoNER hnuaia Non-Lapseable Central Pool of Resources (NLCPR) atanga Rs 4624.12 lakh senga sak mek High Court Building a hmunah enin, Law Secretary Marlin Vangkung leh midang ten an lo dawng sawng a ni.

Union Secretary Dr. Inder Jit Singh chuan Directorate of Sports & Youth Services pawh tlawhin Sports & Youth Services Secretary Pu H. Lalengmawia chuan lo dawngsawngin, Director room-ah inkawmna hun an nei a, Pu H. Lalengmawia chuan Sports lama eizawng tur chherna  hmunpui Sport Academy chungchang te leh thildangte a thlen a, Union Secretary chuan hma a lakpui tur thu a lo sawi bawk a ni. 

Hemi zawhah hian NLCPR atanga sum hmuh Rs 1555.59 lakhs senga sak PHQ Building, Khatla Aizawl pawh a tlawh nghal a, Police lam hotute hian an hmasawnna hrang hrang neih leh hmabak la inchhawp te Union Secretary hnenah hian an thlen a, Union Secretary Dr. Inder Jit Singh chuan ngun taka a lo ngaihtuah tur thu leh hmalak pui a lo tum tur thu a sawi bawk a ni.