Vawiin khan Saitual Bazarah nithum awh tur Saitual Special Handloom Expo-2020 chu bialtu MLA, Minister ni bawk Pu R. Lalzirliana'n a hawng.

Saitual Special Handloom Expo-2020 hawnna inkhawmah khuallian Pu R. Lalzirliana chuan a bial chhung khawpui Saitualah ngei Handloom Expo-2020 hmasa ber an nghah avangin ZOHANDCO Chairman leh a thawhpuite chungah lawmthu a sawi a. Sawrkarin ZOHANDCO a tihnun thar leh takah chuan a thawktute chu tunhma aia taima zawk a inbuatsaih a, mipui leh sawrkar tana thahnemngai taka an thawh zelna beisei thu sawiin, Chairman mithahnemngai tak an neih avangin thlamuanthlak a tih thu a sawi a ni. Minister chuan kan hnam incheina chi hrang hrang phochhuak a theihtawp chhuah thintu puantah leh hnang deh thiamte fakin tunlaiah thangtharte kan pi leh pute kutchhuak ngaihsan kawngah an harhchhuak nasa em em a ni a ti a, pi leh pute kutchhuak Pawnpui, puankawp, bawhtah kawr leh thil dang engemaw zat hmuh tur awm tawhlo chu a vei thu sawiin tharthawh leh turin a ngen a ni.

Saitual District ah Handloom Industry in bu a khuar ngheh theihnan mipuite pawh an rilru inbuatsaih tura chahin, zalenna hnuaia thlamuang taka hna kan thawh theihna hi hmang tangkai a, hnamdang leh ramdangte neih ve theihloh kan chang a ni tih hria a, malsawmna dawng tlak a taima taka thawk turin mipui kalkhawmte a fuih a ni.

Saitual Special Handloom Expo-2020 hi National Handloom Development Programme (NHDP) hnuaiah Mizoram Handloom & Handicraft Development Corporation Ltd. (ZOHANDCO) in a buatsaih a, Development Commissioner for Handlooms, Ministry of Textiles, Government of India in a sponsor a ni.

Saitual Special Handloom Expo-2020 hi February ni 12-15, 2020 chhungin neih a ni ang

Saitual Special Handloom Expo-2020 hawnna inkhawm hi ZOHANDCO Chairman Pu C. Lalrammawia'n a kaihruai a, he Handloom Expo ah hian puan tahtu leh mi 22 in an kutchhuak chi hrang hrang an phochhuak a ni.

ZOHANDCO ah hian Chairman hovin thawktu mi 12 an awm a, Special Handloom Expo-2020 hi Mizoram District Headquarters zawng zawngah nei turin ruahmanna an siam a ni.