Vawiin chawhma khan Dr K Beichhua, Minister of State for Social Welfare Department chuan Jordan Centre, Sethawn a tlawh a, thawktute nen hmalakna kal mek te enho niin chak zawk a hmalak dan tur rel a ni.

Dr K Beichhua chuan Jordan Centre chu ruihhlo vanga harsatna tawk te chhanchhuah mai bak ah eizawnna tlak thiamthil an zirchhuah theihna hmun tangkai tak ni turin ruahmanna siam a ni thu a sawi a, he centre-a tun a kalpui mek zirtirna pathum, Automobile, ICT leh Electronics te bak ah hian Agriculture, Horticulture, Veterinary leh Sericulture lam a inzirtirna pawh kalpui thuai tum a nih thu a sawi bawk. Minister chuan March leh April chhung hian building awmsa thawmthat ngai awm ang ang te thawmthat hna chak tak a kalpui a nih tur thu leh May 2020 chhung ngei a Centre hmun engemawzat chu luah theih hman beisei a nih thu a sawi bawk a ni. Ruahmanna ang a Jordan Centre hi peihfel a nih hun ah chuan India hmarchhak state dangte tan pawh a hman tangkai tham a nih tur thu leh mi sangkhat chuang enkawl theihna hmun a awm tur thu Minister chuan a sawi bawk a ni.

Jordan Centre, Sethawn endikna hunah hian Pu K Liantlinga, Vice Chairman, Social Rehabilitation Board leh member thahnem tak an tel a, Pi Ankita Chakravarty, Director, Social Welfare Department, Pi Vanlalpianpuii, Director, Women & Child Development Department, Pi A Vanlalzawni, Joint Director te leh department a thawktu engemawzat an tel bawk a ni. Vawiin Centre endiknaah hian in dinglai thawmthat ngai sawmthum chuang, in sak thar ngai pathum, inkalpawhna kawng siam ngai te leh infiamna tur khelmual siam dan tur te rel a ni. Jordan centre ram luah lai leh zauh belhna tur nen, a vai hian Hectare 7 vel a zau a ni.