Vawiin khan EDC Mizoram Innovative Challenge – Hackathon chu September Ni 5 leh Ni 6, 2019 chhung atan Govt. Aizawl West College-ah neih a ni a, Planning Secretary Dr. C.Lalramsanga chuan a hawng. Hackathon hi Entrepreneurship Development Centre (EDC), Planning & Programme Implementation Department leh Govt. Aizawl West College tangkawpa buatsaih a ni.

Hackathon hi inelna niin, heta telte hian mipui/vantlang harsatna (public problem) te an rawn chhawpchhuak a. Chung harsatna te chu mimal hnathawh hmanga sutkian dan (private solution) ngaihtuah turin inelna neih a ni.

He programme hi Dr Lalrinchhana, Deputy Adviser, Planning & Programme Implementation Department leh Member Secretary, EDC Governing Board kaihhruaina hnuaiah neih a ni a.  Dr Laldinliana, Coordinator, Incubation Centre, MZU chuan Hackathon chungchangah presentation a nei bawk.

Vawiin hian Hackathon a tel te’n harsatna sawichhuahna hun (problem pitch) an hmang a. Harsatna (problem) tha zual thlanchhuah niin, problem pitch tu apiang team leader an ni nghal a. Team leader chuan a team a awm tur thlangin, an problem chhawpchhuah chu sutkian dan an zawng a ni.

Hackathon ah hian mi 54 telin, MZU, Hrangbana College leh J.Thankima College zirlaite leh hnathawk mek an tel.

Naktukah hian Grand Finale hman a ni a. Team tha ber ten lawmman hetiang hian an dawng ang:-

1st prize – Rs. 50,000/-
2nd prize- Rs. 30,000/-
3rd prize- Rs. 16,000/-
Shortlisted Teams- Rs. 5,000/- each.