Vawiin chawhma khan Mizofed Ltd. Show room, Ramhlun North ah Pu K Lalrinliana, Minister, Food, Civil Supplies & Consumer Affairs chuan LPG Home delivery tlangzarhna hun a hmang a, consumer engemaw zatin LPG home delivery turin an inziaklut nghal a ni.

Minister Pu K Lalrinliana chuan, mahni kawt kai ngeia Gas bur ipek anih theihna tura hmalakna chu hun rei tak ata buaipui anih tawh thu sawiin,’ Tunah chuan Gas lak nana mimalin sum leh pai, tha leh zung leh kan hun hlu tak kan hmanna thin te kha LPG home delivery hian min chhawk hle dawn a ni,’ a ti a,’ LPG Home delivery service hian kan thalaite tan eizawnna rintlak a siam belh phah ngei ka beisei a ni,’ a ti bawk. Minister chuan FCS & CA a thawktute bakah Mizofed Ltd, Mizoram Consumer Union,  College veng Local council hruaitute leh NGO hrang hrangten LPG Home delivery service tih puitlin anih  theih nana an hmalaknaahte lawmthu a sawi bawk a ni.

Pu HL Rochungnunga, IAS, Commissioner & Secretary, FCS & CA Department pawhin thu sawiin FCS & CA department leh Mizofed Ltd te chu thawh hona tha tak hnuaia an awm reng a ngaih thu te, FCS & CA department te hmalaknaah NGO hrang hrang ten mipuite mamawh phuhruk nana a tul apiangah an pui thin chu mizo nih ti nuam tu anih thu te sawiin LPG Home delivery service bultanna leh kalpui zelna kawngah pawh khawtlang leh NGO hrang hrang hruaitute tawiawmna ngen in thawhhopuiah a sawm a ni.

Vawiin LPG Home delivery tlangzarhna programme hi Pu Laldawngliana, Chairman, Mizofed Ltd in a kaihruaia, LPG Home delivery service a inziahluh dan entirnate neih niin Dr Lalhriatzuali Ralte, IAS, Director, FCS & CA in lawmthu sawiin hun a khar a ni.

LPG Home Delivery hi Aizawl College venga in (household) 89 ah enchhinna hmasa kalpui tur a ni a, Interactive Voice Response System (IVRS) number 9089024365 ah call tur niin Agency phone number leh anmahni consumer number te dik taka chhut luh leh tur a ni. Inziahluh atanga ni 4 hmain gas hi dawng thei tura ngaih a ni a, customer number ngai hi ni 21 chhung hman nawn theih ani lo bawk a ni. Tun enchhinna atan hian delivery man hi gas bur pakhat zelah cheng 90 a ni ang a, delivery boy hi 3 an awm mek bawk a ni.