September ni 3 leh ni 4 khan Zoram Medical College (ZMC), Falkawn a Department of Surgery te chuan phai lama doctor thiam bik te sawmin Continuing Medical Education (CME) Seminar leh Live Operative Workshop hlawhtling takin an nei a. Seminar hi ZMC lama doctor thanhnem tak leh Aizawl Civil Hospital lamah senior surgeon te leh hospital hrang hranga thawk doctor specialist rual nen an chim a. Worshop hi Zoram Medical College Director, Prof.L.Fimate in a hawng a ni.

CME Seminar ah hian Pum leh Ril lam (Gastroenterology) thlurbing deuhin an zir ho ber a, sawi hona hlawkthlak tak an hmang a. An mi sawmte - Dr Sujit Chaudhury (Gastroenterology Super Specialist) leh Dr  Deb Kumar Roy (Laparoscopic Surgeon) te chuan thusawina neiin case chi hrang hrang entirna leh zirhona an hmanpui a. ZMC lam atangin Dr Samuel Lalhruaizela, Assistant Professor, Department of Surgery chuan presentation te neiin, advanced endoscopy leh ERCP (endoscopic retrograde cholangiopancreatography) chungchangah an hlawhtlinna te sawina hun neiin, Mizoram tana thil thar a nih thu te a sawi bawk.

Ni 4 September khan Live Operative Workshop te neiin, damlo natna khirh tak, rilpui cancer nei, damlo pahnih chu zai hawng lova, a verha verhin a cancer an la chhuak a. Hei hi Mizoram tan chuan thil thar a nih avangin doctor ten an hlawkpui hle a. Heng damlo pahnihte hi an inzaina bungrua leh senso engmah chawi lovin engkim tumsak vek an ni. Natna chi hrang phaia refer fo thinna te pawh ERCP  hmanga enkawl thei tawh niin ZMC mithiam doctor te hian an sawi a, cheng tam tak sen ngai na kha Mizoram ah ngei a khawl a lo awm tawh avangin leh hemi lamah mithiamte atanga doctor ten a tih dan an zir avangin phai kal lovin Mizorama ngei case thenkhat te chu an khawih thei tawh ang tiin Seminar a tel doctor te chuan an sawi bawk. An mi sawm te nen case panga lai nimin khan an khawih bawk a ni.

Mizoram ah Medical College a lo awm tak avangin thil thar tam tak tih chhoh mek a ni a, Mizoram mipui tam tak tan hlawkna ni se tih chu ZMC lama an surgeon te duhthusam a nih thu an sawi tel bawk.