Tukin zing khan Pu Lalruatkima, Rural Development Minister chuan a bial chhung, Vaivakawna lei khikna lai leh a bula chhungkaw thenkhat chenna in khi  te a tlawh. Chenna In leh lei khikna lai hi hi Vaivakawn, Hunthar leh Chanmari West inrina peng thuam lai a ni a. He in leh lei khi hian Vaivakawna In 7 a huam a, Dawrpui Vengthar lam pawh a huam tel bawk a ni. 

Minister Pu Lalruatkima leh a zuitu official te  chuan In khi leh lei khite hi ngin takin an en  a. Inneitute kawmin an harsatna te an zawt a. In neitute hian an in khi avanga  dinhmun hlauhthawn awma an awm thu te, thinthia an mut ngam loh thute an lo hrilh a ni. Han enchiana puhmawh theih mai tur chu  SIPMIU-in Vaivakawn - Chanmari West panna kawnga pipe phumna tur kawngpui khawl lian hmanga an laih vang te leh pipe phumna hnawhphui leh thuai a nih loh avanga ngaih a ni a. In neitute sawi dan chuan  an in khi chu  a la che zui zel nia an hriat a ni.

Minister Pu Lalruatkima chuan Hazard Safety Cell-in heng in khite dinhmun hi a rang lama enfiah sak turin a ti a. SIPMIU-in kawng a laih hnawh that tawk loh lai awmte pawh hnawh tha tura ngen leh  Geology mithiamte pawh a leilung dinhmun enfiah tura ngen ni se a ti a. He In leh leikhi hi Hunthar veng leimin kumhlun ri mai a nih avangin fimkhur a ngaih thu Minister hian a sawi a. Hmala rang turin Department hotute a ngen nghal a ni.

Minister hian Vaivakawn Junction-a SIPMIU pipe phumna atana laihkhuar, an hnawh hnua khuar leh avanga kawngchhia a en nghal bawk a. A rang lama he kawng hi thawm tha turin PWD department hotute a ngen nghal a.

Ministerin Vaivakawn huam chhunga hmun himlo lai a enfiahnaah hian khawtlang hruaitute bakah DM&R Director - Pu FJ Liantluanga, Aizawl District Addl DC - Pu John LT Sanga, SIPMIU Project Director - Pu Lalrothanga, PuT. Lalnunsanga, EE, PWD Pu leh Geologist Sr. - Pu P. Sanghnuna te pawh an kal ve a ni.