PSTE Trainess Union DIET te Press Conference koh chungchangah Secretary, Govt. of Mizoram, Education Department chuan a hnuai ami ang hian thuchhuah a siam.
‘PSTE Trainees Union DIET- tia invuah ten Sorkar hmalakna dan thenkhat chungchanga an lungawi lohna sawi turin Press Conference an ko tih sorkar-in a lo hria a. Hel hi thil awmdan dik tak chu a ni :
February 18th, 2013 khan India Sorkar ah Programme Approval Board Meeting neih a ni a. Chuta meeting ah chuan RTE Act hman hnu (April, 2010 hnu) a SSA zirtirtu lak te reng reng chu zirtirtu atan an tlak leh tlak loh test turin min ti a. Chumi anih loh chuan an hlawh pek tawh loh tur tih a ni. Nasa taka India sorkar hotute ngen an nih hnu ah a bikin an ni ho tan hian SSA zirtirtu ni zel tlak an nih leh nih loh fiah nan Teachers Eligibility Test buatsaih turin min ti a. Chu chu thla 4 chhunga zo tura intiam in chumi-a tlate chu ruai chhunzawm lo turin min ti a.
He Teachers Eligibility Test ah hian condition hrang hrang a awm tih Sorkar chuan a hria a, chung zing ah chuan Pre-service kan tih ang te hi an zo tur a ni tih a ni. Nimahsela June 17-a zirtirtu te tana buatsaih hi chu SSA-a thawk mek te tan liau liaua tih niin heta an pass anih pawh in nakin hnu zel ah TET exam nen in kaihhnawihna a nei dawn lo tih pawh Pre-Service pawl in ti te pawh hi hrilh an ni a. Chuti chunga Sorkar hmalakna hrethiam duh lo luia hma an la hi chu a vanduai thlak hle a. SSA zirtirtute he test kaltlang tur te hi mi 716 zet an ni a. India sorkar hotute hnenah pawh hengho eizawnna ti tawp mai lo tura Mizoram sorkar hotute ngenna avang a la chhunzawm thei te an ni nghe nghe a ni’.
