NLUP Apex Board meeting vawi 12-na chu Board Chairman Pu Lal Thanhawla, Chief Minister kaihruaina hnuaiah vawiin khan NLUP Implementing Board (NIB) conference-ah neih a ni.

Chief Minister Pu Lal Thanhawla chuan NLUP  India ramin zalenna a neih hnu ah hetiang ang renga  mitin hriat hlawh leh a nawlpuia mipui ril rem hmasawnna programme hi a la awm ngai lo, a ti a. Hetiang taka sorkar leh loneitute inkara inpawhna leh thawh hona tha pawh hi a la awm ngai lo, a ti bawk.  Chief Minister chuan Chalfilh biala MLA bye-election leh Chakma Autonomous District Council result te chuan loneituten NLUP tha an tihzia a tichiang hle a ni, a ti a.University of Minnesota, USA atang mithiam rual Mizoram rawn tlawhtu ten district 5 a khaw 14 an tlawh chhuah atangin Mizoram sorkar-in NLUP a kalpui chu tunlai khawvelin ei leh bar, sik leh sa, tui, boruak leh leilung chhe mek siam thatna tura mamawh chhanna niin an hria a, an phurpui hle a ni, a ti a. Kumin January 28 a scientists mithiam rual ten India International Centre-a Interactive Session an neih ah pawh NLUP chu India rama hmasawnna programme duan chhuah leh kalpui tawh a zawnga danglam ber a ni, tiin khawvel pum huapa mithiam rual kal khawmte chuan mirethei te kuta sum luhna tur te, ram leilung hmanna dan siam thatna tur te, tuihna enkawlna leh mirethei te chawikanna tur zawng zawng te chu NLUP hian a fun kim vek a ni, an ti, a ti bawk a.

NLUP kalpui tawh china hmasawnna langsar zualte tarlangin Pu Hawla chuan hmunphiah avangin loneitu tam tak kum khat sum lakluh chu a let 4 leh let 5 ten a pung a ni, a ti a. NLUP sum hmanga department thuam that avangin Sericulture department chuan loneitute pangngang chi mamawh 60% lai a tum thei tawh a; hetiang bawk hian department dang Fishery, Soil & Water Conservation, Horticulture leh AH&Vety te pawh  kum hnih khatah chuan sangha, ran leh thlai chi ah intodelh tura beisei an ni, a ti a. NLUP sum hmangin loneitute feh kawng tam tak sial a ni tawh tih sawiin Chief Minister chuan kum 2012-13 chhung ngawt pawhin NLUP kawng 400Km a thui sial nan cheng vaibelchhe 39 pek chhuah a ni, a ti a. Nikum lama bawng hrileng vanga an bawng chan te pawh pek an ni leh tawh a, Serchhip, Champhai leh Kolasib-ah te Milk Processing Centre sak a nih bakah Aizawl-a bawnghnute sawngbawlna MULCO chu thuam chak a ni, a ti bawk.

NLUP hlawhtlinna hian ram hmasawnna nasa taka a thlen lai hian harsatna bik avanga NLUP scheme tipuitling thei lo te khaichhuak turin sorkar chu a inhawng reng tih sawiin Chief Minister chuan chhumchhia te tan Chief Minister’s NLUP Special Scheme siam a ni tih a tarlang a. NLUP rah chhuah seng tak tak hun chu kum 5 hnu lam a la ni dawn tih sawiin tuna he project kal mek hmawr bawkna tura Exit Protocol buatsaih chuan NLUP hma lam hun a hril dawn chauh a ni, a ti. Kut hnathawktute thar chhuah tihralna turin thei leh thlai sawngbawlna te, market support leh market ruhrel tih changtlun lam te uar zawka kalpui tum a ni tih tarlangin  Pu Hawla chuan NLUP hnuaiah Mizoram 80% chu ramngaw a siam thar leh a, chumi zinga 10% chu thingtlang mite chak lak nana zuah turin  Afforestation Master Plan  vaibelchhe 500 senna tur buatsaih a ni tih a sawi a. Mizoram sorkarin thahnem ngai taka miretheite khaichhuahna tura NLUP a kalpui lai hian harsatna bik neite chungah zahngaihna lantir a nih rualin beneficiary rinawmlo te chungah chuan khauh taka dan lek a ni ang, a ti bawk.

Mamit district-a National Highway siam mek ah contractor leivung paihin NLUP hnuaia sangha dil a tih chhiat report awm chu Chief Minister chuan a changtu PWD hotute hnenah enfiah vat tur leh contractor chu dan anga hna thawk a, a thil tih chhiat man zangna dawmna pawh pe tura hriattir turin a ti nghal a ni.

Vawiina NLUP Apex Board meeting ah hian  Dr.J.S. Samra, CEO National Rainfed Area Authority chuan thingtlang khaw 11 a tlawh atanga NLUP hmalakna a hmuh dan leh rawtna a neih te tarlangin thu a sawi a. District tin atangin Deputy Commissioner te leh NLUP line department 9 ten an  hmalakna kawnga an hmasawnna leh harsatna neih te tarlangin presentation an nei theuh bawk a. NLUP kalphung ah siam that leh thlak danglam ngaite thlir hovin member ten rawtna an neihte nen zau taka sawihona neih a ni.