Tarlan tawh angin naktuk June ni 11-ah hian ‘Green Mizoram Day 2013’ hman a ni dawn a, a hawnna inkhawm hi ICFAI-University Campus, Durtlang ‘N’ ah zing dar 7:30-ah neih tan a ni ang a. Mizoram Chief Minister, Green Mizoram Committee Chairman ni bawk, Pu Lal Thanhawla chu Khuallian niin Environment & Forests Minister Pu H.Rohluna chu Khual Zahawm a ni dawn a ni. Green Mizoram Day pual hian Khuallian leh Khual Zahawm te bakah sorkar mi pawimawh leh mi sawm bik ten thing an phun vek ang.

State Level Committee on Green Mizoram-in a rel tawh angin kumin thupui tur chu ‘Thing phun la, i ram chhan rawh’ (Plant Trees - Save Your Land) tih vuah a ni a. Environment & Forests chuan he Ni-a district zawng zawngah a theih anga tam thingphun tur a sem tawh a, hei bakah hian CYMA leh pawl/mimal te nen tangkawpin a uar theih ang bera thingphun turin ruahmanna a siamfel tawh a ni.

Green Mizoram Committee in a rel tawh angin kumin atang hian ‘Green Mizoram Day’ hi kumtin June ni 11-ah hman a ni tawh ang a, sorkar department hrang hrangte pawhin he Ni ah hian thingphun leh an phun hmasak tawhte enkawlna Ni atan an hmang bawk thin ang. Department-te chu an thingphunte an enkawl zui tha em tih a hmunah enfiah a ni thin ang a, ti tha te chu lawmman pek an ni bawk tawh dawn a ni.

Attachment

  • Loading attachment...