Pu Lalchhandama Ralte chuan Education dah hniamna hmunah ram a tlu chhia ang. Chuvangin, Education hian hmun sang chang rawh se tih chu ka auhla a ni a ti.            

He thu hi Vawiina Synod Conference a hman Mizoram Middle School Teachers Association (MSTA) Annual Conference-ah khuallian niin a sawi a. Minister chuan School Education Department hi sorkar Department 45-a thawktu zaa 30 thawhna a ni a, kan khaw hawi hian kan ram hi a al thei a ni a ti. Kiltina thawktuten kan hna theuh tha taka kan thawh chuan kan ram hi a chawi kang dawn a ni a ti bawk a.  Sorkarin khua leh tuiten zirna tha an dawn theih nan sum leh pai tam tak sengin hma a la a, chutih laiin enrolment a tlahniam a, nu leh paten an fate private school lamah an luhtir duh zawk tlat a, kan zirtirtute hian zirlai hip  turin par rim tui chhuah a tul ta a ni a ti bawk.      

Minister chuan zirtirtu kalkhawmte chu kum tharah enrolment a pun theih nan tlawmngai pawlte phungbawma sawma tan la turin a fuih a ni. Minister chuan School inspection chu sorkarin uar a tul tih a hria a, uluk zawkin a kalpui dawn tih a sawi a, Zirtirtute chu an kuta awm zirlaite chu kan ram future dik tak an ni tih hre thar a, tan la  thar turin a chah a ni.      

MSTA Annual Conference hi an pawl President Pu Rosangzuala’n a kaihruai a, chawhma lamah School Education Minister hova hun an hman bakah chawhnu lamah ro an rel a ni.  Aizawl khawpui chhunga memberte leh Sub Hqrs hruaitute an kalkhawm a, MSTA ah hian member 2479 an awm a ni.