Coordination Committee on Traffic Management chu vawiin chawhnu dar 2 khan Chairman Pu Lalchamliana, Home Minister hovin Secretariat Conference Hall ah an thukhawm a, kan hma lawka Krismas leh Kumthar hunpui laia motor tlan dan tur te an rel. Committee chuan heng hunpui ah hian kum danga lo tih thin angin December ni 23 & 24 leh 31 ah mipui te thawl zawka an vah vel theih nan Chanmari - Zodin Square inkar huamin No Vehicle Zone siam leh ni se tih an rel a, heng hunpui ah hian Veng / Pawl / Kohhran ten programme an buatsaih thin chu motor leh mipui veivak tibuai lo zawnga siam thin ni se tiin an rel bawk.

Chairman Pu Lalchamliana chuan Traffic Management chungchangah member te infinchhuah tlang zel thin turin a sawm a, Co-Chairman Pu T.J.Lalnuntluanga, Transport Minister chuan Motor Vehicle Act sorkar laipuiin a duan thar chungchang sawiin Mizoram mipui tana phurrit ni lo tura kan tlin tawk mila Dan thar chu siamdanglam tura hmalak mek a nih thu te a tarlang bawk.