947/2024-2025

Aizawl the 25th June, 2024: Dr Vanlalthlana, Minister, Education, I&PR etc. chu New Delhi-ah Sawrkar Laipuia hotu lute dawr in a cham mek a. New Delhi-a a cham chhung hian Shri Dharmendra Pradhan, Union Minister of Education; Shri Ashwini Vaishnaw, Union Minister of Information & Broadcasting leh Electronics & Information Technology; Shri Sanjay Jaju, Secretary, Information & Broadcasting; Shri S. Krishnan, Secretary, Ministry of Electronics & Information Technology; Shri Sanjay Kumar, Secretary, Ministry of Education & Literacy leh Shri K. Sanjay Murthy, Secretary, Ministry of Higher Education te a dawr a ni.

Minister Dr Vanlalthlana hian Education Minister Dharmendra Pradhan chu Mizorama zirnain hma a sawn theih nana Mizoram sawrkar hmachhawp hrang hrang a sawipui a. Sawrkar laipui aṭang ṭanpuina awm theite sawipuiin Samagra Shiksha leh RUSA scheme hnuaia sum dawn hmabak awmte a hma thei ang bera pe chhuak turin a ngen a. NIT, Lengpui campus a hlawhtlin thuai theih nan leh Mizoram Engineering College din fela zirna kalpui a nih vat theih nan ngenna a thlen bawk a. NIT chungchanga hmalak chhunzawm dan tur leh Engineering College din nan PMJVK project chak zawka kalpui a nih theih dan te an sawi dun a ni.

Information & Broadcasting leh Electronics & Information Technology Ashwini Vaishnawnen an indawrnaah Dr Vanlalthlana chuan I&PR leh ICT Department-a Mizoram Sawrkar hmachhawp hrang hrang a sawipui a. Mizoram University-a Software Technology Park din tura hmalakna hrang hrangte sawi dunin, Digital India scheme hnuaia hmalak theih dan tur awmte an sawi dun bawk.

Minister Dr Vanlalthlana hian a department chan hrang hranga Sawrkar Laipui Secretary-te a dawr bawk a. Sawrkar Laipuikal tlanga Mizoram Sawrkarin hnathawh tur a ruahman leh hmachhawp a neihte chak zawka kalpui a nih theih dan turte sawiin, inkawmhona hun hlawk tak an hmang a ni.

Minister Dr Vanlalthlana hi June ni 22 (Inrinni)-a GST Council meeting-ah Taxation Department official-te nen telin New Delhi-a Sawrkar Laipui hotulu hrang hrangte dawrin a cham chhunzawm a, ruahman dan ang chuan June 26 (Nilaini) hian Mizoramah a lo let leh ang.