946/2024-2025

Aizawl, the 25th June 2024 : Home Minister Pu K Sapdanga, Urban Development & Poverty Alleviation changtu ni bawk chuan vawiin khan Aizawl Smart City Ltd. hnuaia din, IT hmanga Aizawl khawpui hmun hrang hrang viltu nia ngaih theih – Integrated Command & Control Centre, Old Secretariat, Raj Bhawan bula awm chu a tlawh a, Aizawl Smart City Ltd. hotute leh helai hmun thawkte’n ICCC chanchin leh hnathawh tlangpuite leh IT thiamna leh camera hrang hrang hmanga Aizawl khawpui an vil dan chanchin te an hrilh.

Home Minister Pu K Sapdanga chuan Aizawl khawpui mipuite him nan leh tunlai thiamna hmanga engtik lai pawha lirthei leh Aizawl khawpui hmun hrang hrang vil theihna ICCC hi a tangkai hle nia a hriat thu sawiin tunhnaia misual hnuchhuina kawngahte leh lirthei intihpalhna leh lirthei in mihring a sut a tlansan te chu ICCC a camera atangin hriatchhuah a ni a, hei hi a tangkaina peng pakhat chauh a ni a. Chhiatrupna a thlen palh thu hlaah leh khuarel chhiatna a thlen a Aizawl khawpui chhunga information inpek zung zung theihna atana ICCC hi kan hman tangkai leh zual a tul thu te a sawi a ni.

Pu C Lalchhuangkima, CEO Aizawl Smart City leh Johnson D Thianga ICCC Engineer te chuan ICCC chanchin tlangpui te presentation hmangin a tarlang a. Tunhnaia lirthei chetsualna leh lirtheiin mihring a sut, an tlansan maite chu ICCC camera in an chhuichhuah dante an sawilang bawk a ni. Home Minister hi Addl Secretary, Home, Pu Joseph Lalrinsanga leh Joint Secretary, Disaster Management & Rehabilitation Pi Zarzokimi ten an tawiawm a ni.

Integrated Command & Control Centre bun nan leh kum 5 chhunga a enkawl nan cheng vaibelchhe 101 vel ruahman a ni a, a bun hna hi Bharat Heavy Electricals Limited (BHEL) pek niin anni hian Agreus Infotech Limited an thawh tir leh a. Nikum April ni 1 khan Home Minister Amit Shah in a hawn hnuin kum 2023, July thla atangin a hman theih (go live) ta a ni.

ICCC-ah hian control room, conference room, reception area, operator room leh data centre changkang leh changtlung tak te a awm a. Aizawl khawpui chhung hmun hrang hrangah Surveillance camera hmun 76 ah bun niin Fixed Camera 236 bakah Pan Tilt Zoom (PTZ) 39 a awm bawk. Khawpui kawtchhuah pawimawh hmun 14-ah Automatic Number Plate Recognition (ANPR) Camera dah niin, Facial Recognition System khawpui chhung hmun pawimawh 5-ah leh khawpui chhung hmun 4-ah Environmental Sensor dah a ni bawk. Bawlhhlawh paih motor 140-te monitor-na tur GPS hmang Solid Waste Management Application Dashboard bakah Aizawl khawchhung chanchin hriat zung zung theihna Variable Messaging Display' hmun 4-ah dah a ni. Vantlang mipui tana a thlawna hman theih tur wifi hmun 15 ah bun tel a ni bawk.