4108/2025-2026

Dated Aizawl the 22nd January, 2026 : Vawiin khan State Council of Educational Research and Training (SCERT), Science Promotion Wing buatsaihin MBSE hnuaia HSLC leh HSSLC examination-a Science leh Mathematics Subject-a zirlai titha lawmman semna ‘48th Incentive Cash Award for Proficiency in Science & Mathematics, 2024 – 2025’ chu Vanapa Hall-ah neih a ni a. He hun hi Education Minister Dr. Vanlalthlana chuan Khuallian niin a hmanpui.

He hunah hian khuallian Dr. Vanlalthlana chuan thu sawiin, Science leh Mathematics chu subject pawimawh tak an nih thu leh khawvel thiamna thang zelah mamawhna a san zel thu a sawi a. Mizoram chhungah heng Subject-a tui mi leh taima taka zir thin an awm chu lawmawm a tih thu sawiin, hun lo kal zel turah pawh zirlai tam zawkin Science leh Mathematics Subject-ah tuina an lo chhar zel a beisei thu a sawi a. Zirna tha zawk kalpui a nih zel theih nan Sawrkar chuan zirchianna leh ruahmanna tha a neih zel tur thu a sawi bawk.

Education Minister chuan hlawhtling tur chuan taimakna a pawimawh thu a sawi a. Khawvel hriata mi ropui leh hlawhtlinna changtute hi vawi tam tak hlawhchham chunga beidawng duh lote an nih thu sawiin, hlawhchhamna karah pawh beidawng mai lo a; tang fan fan turin he huna kalkhawmte a fuih a ni. Education Minister Dr. Vanlalthlana hian 48th Incentive Cash Award for Proficiency in Science & Mathematics lawmman a sem nghal bawk a ni.

Vawiina 48th Incentive Cash Award for Proficiency in Science & Mathematics 2024 – 2025 hmanna hi thawhhniha then niin, a thawhkhatna ah hian zirlaite’n hlawk zawha Mathematics & Science hriatthiam an neih theih nan hun hman a ni a. Prof. J. Lalvohbika, Deptt. Of Mathematics, Pachhunga University College chuan ‘Driving Passion for Mathematics’ tih thupui hmangin, Mathematics Subject lama zirlaite tuina thar an neih theihna tur Presentation a pe a. Pu Lalngilneia, Sr. Scientific Officer, MISTIC, Deptt. of Science & Technology chuan ‘Artificial Intelligence and Data Science’ tih thupui hmangin tunlai thiam tangkaina leh fimkhurna turte sawizauna hun a hmang a ni. Hun thawhhnihnaah hian Pu F. Lalliansanga, Deputy Director(SPW), SCERT atangin Technical Report ngaihthlak a ni a, lawmman semna hun hman a ni bawk.

Science Promotion Wing (SPW), SCERT hi kum 1973 khan School Education Department hnuaiah din a ni a. Kum 1978 khan Incentive Cash Award for Proficiency in Science & Mathematics hi Mizoram a Science & Mathematics zirna in hma a sawn zel theih nana duan chhuah niin; Assembly House-ah Legislate a lo ni tawh a. Kum tin neih chhunzawm zel niin; 48th Incentive Cash Award for Proficiency in Science & Mathematics, 2024 - 2025 a lawmman dawng thei turte chu HSSLC leh HSLC Mizoram Board of School Education-in a buatsaih Examination Result Top 3 –te a an ni a. HSLC-ah Science Subject-ah zirlai 25 leh Mathematics Subject-ah zirlai 15 te’n lawmman an la a. HSSLC ah Mathematics Subject-ah zirlai 3, Physics Subject-ah zirlai 7, Chemistry Subject-ah zirlai 4 leh Biology Subject-ah zirlai 5 te lawmman lain, 48th Incentive Cash Award for Proficiency in Science & Mathematics, 2024 – 2025 ah hian zirlai 59 ten lawmman an la a ni. He hunah hian State Council of Educational Research & Training (SCERT) leh Mizoram Board of School Education Department (MBSE) hotute an tel bawk a ni.

Zirlai lawmman late list hi a hnuaiah hian download theihin attach a ni.

Zirlai lawmman late.pdf