340/2025-2026

Siaha the 25th April 2025: School Education Minister Dr Vanlalthlana chuan zan khat riakin Siaha a tlawh a, nizan khan circuit house Siaha-ah sawrkar official leh MADC-a sawrkar hruaitute leh party hruaituten an lo hmuak.

Tukin zing dar 7 atanga dar 10 inkarah a duh apiangte hmuh theih turin Circuit house-ah a thu a, mimal leh pawl thahnem takin hmuin an duh leh mamawhte an thlen a ni.

Chawhma dar 11 ah Government Saiha College, Siaha tlawhin thawktute nen inkawmhona an neih hnuin Class room, Library, Seminar hall leh Staff Quarters bakah Boys hostel sak mek te a hmunah a tlawh bawk. Prof Abdul Hannan Barbhuiya, Government Saiha College Principal tarlan danin Government Saiha College hi 20th July, 1978-ah din a ni a, kum 2020 khan NAAC Accreditation ‘B Grade’ a hmu a, department 7 – English, Mizo, Political Science, History, Education, Economics leh Sociology awm mekin zirlai 374 (even semester) an awm a, Library-ah lehkhabu 7960-a awm a, CCTV vuah vek niin kum 2022 atangin library automation an kalpui tawh a ni. Government Saiha College-ah hian teaching faculty 24 awmin an zingah hian contract/part-time/casual-a thawk 12 an awm a, post ruak 6 a awm bawk.

Dr Vanlalthlana chuan Minister dinhmun luah mahse zirtirtu a la ni reng a ti a, an harsatna leh mamawhte a hriatthiampui tih a sawi. College hmasawnna tura rawtna leh mamawh an neih ang ang ziaka thehlut thin turin a chah. Zirtirtu leh thawktu dang post ruak pawh a theih dan kawng kawnga hnawhkhah chhoh mek a ni tiin, Library-a dah tur lehkhabu leina a pek tur thu a sawi bawk.

Minister hian District Education Officer (DEO) Office leh Government Higher Secondary School tlawh bawkin thawktute nen inkawmhona an nei a, tun tuma an zin chhuah chu Chief Minister-in Minister zawng zawng district tin fanga, district headquarters nilo khua pawh tlawh tura a tih vang ani tiin hun remchang a awm chuan lo tlawh leh a tum thu a sawi bawk. A hmun ngeia kalchilha hmuh hian rinthua thiltih aiin ram leh hnam tan a that zawk thu sawiin, office atanga thu tihtluk dawnah pawh kan mitthla theih ngei kha kan duhdan a ni a tibawk.

Chawhnu dar 1-ah Siahatla-a District Institute of Education and Training (DIET) Saiha Girls Hostel sak mek tlawhin a sak dan tura duan ang thlapa sak a ni em tih chipchiar takin a en a. Contract hna thawh reng rengah hna a tha lo anih chuan contractor an koh tur thu leh a tul anga an titipui hnuah an hna a la tha lo fo anih chuan an security deposit atanga thawh emaw firm blacklist emaw mai bakah an hnuaia thawktu engineer thlenga blacklist a la tula a rin thu Minister hian a tarlang bawk.

DIET Saihaa thawktute leh Zirlaite nen inkawmhona an nei a. Education Minister chuan Zirtirtu kalkhawmte chu nakina zirtirtu la ni tur an zirtir tih hriain tha leh uluk taka zirtir turin a chah a, an tu leh fate la zirtir tura an rinngam tur zirtirtu chherchhuah tum turin a fuih bawk. Zirtirtuin zirlai engzat nge a zirtir a, subject pakhat mi engzatin nge zirtir tih data kimchang an neih thu sawiin Hnahthial leh Khawzawlah DIET din tum a nih thu a tarlang bawk.

DIET Saiha hi kum 2005-ah District Resource Centre (DRC) tih hmingpua din a ni a, kum 2012-ah DIET puitlingah hlankai niin kumin hian Centre of Excellence-ah thlan an ni. Zirlai hi semester khatah mi 50 lak niin tun dinhmunah zirlai 98 awm mekin zirtirtu 11 an awm a, zirtirtu post ruak 7 a awm bawk. DIET Trainees Union-in Minister hnena dilna an thlen zinga mi Smart classroom a ngaihtuah sak nghal tur thu leh zirlaite thut hahchawlhna tur Inte (shed) sak nan cheng sing sarih a pek tur thu zirlai hruaitute a hrilh nghal a ni.

Dr Vanlalthlana, Minister hi Pu Malsawmtluanga, Joint Secretary, School Education Department, Pu C. Lalthanzira, State Project Director, Samagra Shiksha, Mizoram, Prof. Benjamin Lalrinsanga, State Nodal Officer (NEP) Higher & Technical Education Department, Pi NG. Fanchun, DEO, Siaha, Pu T. Chatlua, Addl. DPC, Samagra leh MADC-a official te’n an tawiawm a, tlai dar 3-ah Aizawl pan turin Siaha an chhuahsan a ni.