101/2025-2026

Aizawl, the 9th April, 2025: Sawrkar kaihhnawih hna pawimawh buaipuia New Delhi-a cham mek, School Education Minister Dr. Vanlalthlana chuan nimin khan Sawrkar laipuia Minority Affairs leh Parliamentary Affairs changtu Minister Pu Kiren Rijiju bakah, Development of North Eastern Region (DoNER) leh Education changtu Minister of State Dr. Sukanta Majumdar te chu hmuin, Mizoram hmasawn nana pawimawh leh tul hrang hrangte a sawipui.

Minister Dr. Vanlalthlana hian India hmar chhak atanga Union Minister dinhmun pawimawh tak chelhtu Pu Kiren Rijiju chu tlawhin a kawm a. Kawng hrang hranga Mizoram hmasawn ngaihna laite sawipuiin, Sawrkar laipui nen thawh hona tha tak neih a nih theih nan a chan Ministry of Minority Affairs pawimawhnate a sawipui a. Mizoramin tanpui a ngaihna zawnah theihtawp chhuahpui thin turin a ngen nghal bawk.

Education Minister Dr. Vanlalthlana chuan DoNER leh Education changtu Union Minister of State Dr. Sukanta Majumdar pawh hmuin Mizoram Legislative Assembly thutkhawm hnuhnung berin Mizoram State University Bill a pawm thu a hrilh a. Mizoram State University din chhoh a nih hunah Sawrkar laipui puihna leh kaihhruaina mamawh a nih dawn thu a thlen a. Heng bakah hian Mizoram zirna in sang zawkte tihhmasawn nana pawimawh hrang hrangte sawipuiin, Sawrkar laipui puih ngaihna laite a sawipui bawk.

Hei bakah hian Minister hian Medhavi Skills University, Gurgaon a tlawh a. Education leh IT sector kaihhnawih company/corporate pariatte chu a thlenna Mizoram House-ah a kawm bawk.