New Delhi-a Sorkar pawimawhte umzuia cham mek, Education Minister Pu. Lalsawta chu nimin chawhnu khan Sorkar laipuia School Education & Literacy Secretary Pu R. Bhattacharya nen inkawmna hun tha tak neiin, a hnuaia Department pawimawh hrang hrangte an sawiho. Hindi zirtirtu 1,305 hlawh, thla li lai an lak theih tawh loh thuah August thla chhunga rawn pek an intiam a, rualbanlote zirtirtu (IEDSS teachers) ten kum hnih lai hlawh an lak theih tawh loh pawh a rang thei ang bera tihfel a tiam bawk. Zirtirtu thlan dan, Teachers’ Eligibility Test (TET) neih thuah Mizoram bikin harsatna kan neihte leh Vocational Education kalpui dana remfel ngaite sawi dunin, hengte hi Secretary chuan lo enfel pui a tiam a ni.

Hetih lai hian kum 2009-a Mizoram Sorkarin Education Reforms Commission a din, Sorkar pawhin tih hlawhtlin tura a lo pawm tawh atanga DPR siam kal zelah tun hnai hian NEC atangin Mizoram Sorkar chuan cheng vaibelchhe engemawzat hmuh a beisei a. Mizoram Sorkarin DPR Rs. 815 crores zet a siam chu phase li ah thenin phase khat atan Rs. 272 crores a siam chhuak a. Hei hi Planning Commission, DoNER Ministry leh NEC-ah sem a thehluh leh a ni a, NEC hian hma an rawn hruai dawn niin hriat a ni bawk.