Zomi Cultural Society, Mizoram buatsaihin Zomite ni pawimawh tak Zomi Nam Ni, tum 70-na chu vawiin chawhma dar 11 khan Champhai Vengthar Community Hall-ah lawm a ni a. He hun hi Education Minister Pu H.Rohluna chuan khuallian niin a hmanpui a ni.

Khuallian chuan Zomi Hnam Ni hmang tura lo kalkhawm mipuite chu chibai  bukin, Zomi Nam Ni chu zohnahthlak Zomi hmun hrang hranga awmte’n kum tin ropui taka an hman thin thu a sawi a. Zohnahthlakte chu  tawng leh tih dan phungte dang deuh thin mahse lak hran tak tak theih kan ni lo a ni, a ti a. Tupawh hi inlahrang thei kan ni lova,  inpumkhatna hi kan ngaipawimawh tur a ni, a ti a. Mizoram sawrkawrin zohnahthlak hmun danga awmte hmakhua a ngaihpawimawh thu sawiin, Chief Minister ngei pawhin Myanmar ram chhunga zohnahthlakte a hmun ngeia kalin a tlawh tawh thu a sawi a. An harsatna leh mamawhte Central sawrkar hnenah pawh a  thlen tawh bawk a ni, a ti a. Education Minister chuan pipute atanga kan tihdante chu  awi nung zel a pawimawh thu leh Kristianna nena inkalh lova kal a tul thu a sawi a. Sawrkar hmalakna Act East Policy hnuaiah  Border Trade, Land Custom Station-te kalpui a nih thu sawiin a mihring lam kan in unaua, kan inlungrual phawt chuan hlawhtlinna a awm ngei ang, a ti a. Inkalpawhna leh insumdawntawnna tha zawk awm theih nan Border area khuaah te Border Hat din tura Central swrkarte dawr niin bawhzui zel anih tur thu a sawi a. Tunlai khawvel hmasawnna thang zelah inlungrualna tha awm thei zel se a duh thu a sawi a. Tunhma atanga lo hman thin anga Zomi Nam Ni hman a ni thei chu lawmawm a tiin hemi buatsaihtute chu fakawm a tih thu a sawi a. Kalkhawm mipuite chu Mizo hnahthlak zinga mi, Mizo leh Mizoram neitu an nih in hre thar leh a, hun nuam tak hmang theuh turin duhsakna a hlan nghal bawk a ni.

He huanh hian Pu Nangsianmung, President, Zomi Cultural Society (ZCS), Mizoram pawhin thu sawiin Zomi Nam tih hnam hming chu Rev ST Haugo-in Zomi Baptist Church Convention, Halcha, Chin State-ah Kum 1953-ah a phuah thu a sawi a. He hunah hian kan thlahtu chu ‘Zo’ a ni a, keini hi ‘Zomi’ te kan ni ti a a sawi chu palai kal zawng zawngin lungrual takin an pawm vek a ni, a ti a. He Zomi tih hnam hming hi Zomi Labour Corps palai pakua te chuan kum 1914 velah khan King George V bulah pawh Zomi hnam kan ni tiin an lo thlen daih tawh thu a sawi a. Tunah hian Zomi Tribe Recognition ngenna memorandum chu Zomi Cultural Society hmingin Mizoram Sawrkarah thlen anih tawh thu a sawi bawk a ni.

He hun hmanpuitu Pu C.Lalbiakzauva, President, Sub-Headquarters YMA Champhai pawhin YMA leh Zomi Cultural Society (ZCS) ten thawhhona tha tak an nei thin chu lawmawm a tih thu a sawi a. Zohnahthlak hnam hrang hrangte chu Zoram neitu vek kan ni a, Culture leh tih dan phung inang nei kan ni, a ti a. Hun kal tawha chibil inthliarna, indona leh innghirghona lo awm thin tawhte chu hnualsuata, tan rual angaih tawh zawk thu a sawi a. Hnam ziarang leh tawngte vawngnun tlat a pawimawh thu a sawi a.  “Chhinlung chhuak Zofate tih hian min phuarkhawm zel se, unau kan nih i vawng nung zel angu”, tiin kalkhawmte chu a sawm a ni.

Vawiin chawhma programme-ah hian Pu T.Thang, President ZCS Champhai Hqtrs. chuan kalkhawmte lawmna thu a sawi a. Zomi hnam zirna, infiamna leh hnathawhna lama mihmingthate hnenah khuallianin chawimawina a hlan a. Mal zai leh hnam lam hrang hrangte ngaihthlaka entir niin Rev Thang Do Cin-an lawmthu sawina neiin hun a khar a ni.

Zomi Nam Ni hmanna programme hi nizan lam atang khan neih tan a niin tukin zing lamah ‘Zolai gelhdan’ (Zomite ziahdan) tih thupuia hmangin Seminar neih a ni a. Vawiin chawhnu lamah kum 2018-2020 chhunga ZCS Mizoram hruaitu thar thlanna an nei a. Zan lamah a kharna hun an hmang leh dawn a ni.

Vawiin Zomi Nam Ni lawmna hunah hian Education Department lama hotute, Zomi hnam Champhai leh a chhehvela mite leh Aizawl lam atanga lokalte an tel tha hle a ni.