Vawiin khan Pu Hmingdailova Khiangte, MLA chuan Kolasib MUP chhim area conference vawi 8 na chu Thingdawl Primary Sikul-III ah a hmanpui.

Khuallian chuan thu sawiin Upa te chu Lalpa tih tute an nih angin an damchhung pawh a sei a, Mizo khawtlang thlamuantu chu Upa te an ni a ti. Hnam changkang apiangin Upa te an zah a, hmanlai Mizo kalphungah pawh Upa zahna hian ngaih pawimawh a hlawh hle a, chaw ei na hmunah pawh aia Upa chaw an bar khalh ngailoh thu tarlangin, tunlai Mizo te khawvelah hian aia Upa zahna tla hniam tulh tulh chu vei awm a tih thu sawiin inzir tur kan nghah hle a ni a ti. "Aia Upa zahna hriatloh chuan Hnam thinlung a puitling theiloa, Hnam thinlung a puitlin loh chuan Hnam Ropui a nih theiloh" tiin aia Upa zah inzirtir chu chhungtina nu leh pa mawhphurhna a nih thu a sawi a, he huna Upa kalkhawm te chu an tawnhriat neihthat te Sawrkar leh khawtlang hruaitute finchhuah nana hmang turin a chah a.

Pu Hmingdailova chuan khawvela Ram hrang hrang inzawmkhawm pawl United Nations Organisation(UNO) pawhina Upa te pawl a ngaihven hma in Mizoram ah chuan kum 1957 ah Upa Lengkhawm pawl tih hming vuah a Upa pawl din a nih thu tarlangin chu chu kum 1961 khan Zoram Upa Pawl tia hming thlak niin kum 1992 khan Mizoram Upa pawl tia hming thlak leh a ni a, hei hian Mizote thinlungah Upa ten hmun an chang sang hle tih a tilang ani a ti a, Mizote chu Kristianna nunpuitu Hnam kan nih theih nan Rinawmna leh Dikna chu thangtharte hnenah hnutchhiah turin Upa kalkhawmte chu a sawm a ni.

Kolasib MUP Chhim area ah hian Unit 8 (pariat) heng Thingdawl Unit-I, Thingdawl Unit-II, Thingdawl Unit-III, Khuangpuilam, Diakkawn, New Diakkawn, College Veng leh vengthar unit te an awm a, Member 1450 awmin, nikum chhung khan mi 32 in chatuan ram an pan a, he hunah hian Unit 8 atangin Palai 168 an kalkhawm a ni. He hun hi Area President Pu Ralliantawna'n a kaihruaia chawhnu lamah rorel inkhawm neih a ni.