527/2025-2026

Aizawl dated 9th May 2025: Vawiin chawhma khan Dr. Vanlalthlana, Minister, School Education Department chuan Aizawl North II bial chhunga High School Leaving Certificate Exam result chhuak a Top 10-a langte hnen ah lawmpuina thilpek a hlan.

Minister Dr. Vanlalthlana chuan a bial chhunga HSLC result tihchhuah hnuhnung ber a mi pathum lai mai Top 10-ah an lang thei chu lawmawm a tih thu a sawi a. Zirlai naupangte cho phur nan a bial chhunga HSLC leh HSSLC Exam a Top-10 a langte chu kum 2020 vel atang khan lawmpuina Laptop a pek thin thu a sawi a. Hlawtlinna chang thei tura an thawhrimna leh inpeknate chu fakawm a tih rualin an hlawhtlinna phen a mi pawimawh takte chu an nu leh pa, an chenpui chhungkua leh an zirtirtute an nih thu a sawi.

Dr. Vanlalthlana chuan UPSC exam a hlawhtlinna chang thei turin leh National level exam pawimawh, JEE leh NEET-ahte mizo zirlaiten dinhmun sang an hauh ve theih nan Class-10 an pass hlim atangin UPSC Coaching, inchherna hun tha ruahman tum a nih thu a sawi a. Zirlai taima, tumruh leh tih tak tak duhna thinlungpute tan he ruahmanna hian an Graduate thleng a huam tur thu a sawi.

Education Minister chuan zirna avanga sum kan hman chu sum hman ralna satliah ni lovin sum peipunna (Investment) tha tak, zirlai chher puitlinna, khawtlang, ram leh hnam hmasawnna thlen theitu a nih thu a sawi a. Zirlai kan nih chhungin khawtlang leh zirna pawn lam thil dangah inhman dan chintawk hriat a pawimawh thu a sawi a. An zir zawmna tur ah an tuina leh nakin zela an tangkaipui tur subject thlang thiam turin a chah a. Ram hmasawn nana mi tangkai nih tum tlat turin duhsakna a hlan bawk a ni.

Vawiin a HSLC exam-a titha, lawmpuina thilpek dawngte chu; 2-na Malsawmkima, S/o Pu Zarzoliana, Ramhlun South, 7-na V.Lalremruata, S/o Pu Lalduhsaka, Ramhlun North leh 9-na Lalhmingsangi Hnamte, D/o Pu Remsiama, Ramthar veng te an ni.