528/2025-2026

Aizawl, 09.05.2025: Directorate of Science & Technology, Govt. of Mizoram bul tumin Innovation Facility Centre, MINECO, Aizawlah vawiin khan Mizoramah National Technology Day pualin hun hman a ni. May 11, 1998 khan Rajasthan-a hmun pakhat Pokhran-ah hlawhtling takin India ramin nuclear test a neih avangin khawvela nuclear tha chakna hmang thiam leh ralthuam nei ram tlêmte zingah a tel ta a ni. He ni chhinchhiah tlâk tak hriatrengna atan hian kum tin National Technology Day atan May 11 hi hman zui a ni ta a ni. Kumin hian National Science Day hi Pathianni ah a tlak avangin vawiin zirtawpni hian a puala hun hman a ni.

Mizoramah National Technology Day hi Directorate of Science & Technology, Govt. of Mizoram bul tumin Innovation Facility Centre, MINECO, Aizawlah hman a ni a. Er. H. Lalsawmliana, Chief Scientific Officer-in he hun hi a kaihruai a ni. Khuallian Pi Irene Zohlimpuii Pachuau, Addl. Secretary, Planning & Programme Implementation Department chuan thu sawiin, tun hma chuan India hi science leh technology-ah a hnufum thei em em a, ram dangte khawl siam sa a lei nasa thin a ni. Amaherawhchu kum 1999 atanga vawiin thlenga India-in science leh technology lama hma a sawn chak zia te hi a hmutu leh hmangtu kan ni a, kan vannei hle a ni a ti. Technology hian min hual vek tawh a, smart phone kaltlangin thil tam tak kan ti thei a, online-in kan bazar a, dating apps te pawh kan hmang tangkai ta hle a, hnathawhnaah te, indonaah te, IT lamah te pawh technology hi a tangkai em em a ni, a ti a. Zirlaite te chu ngun leh chîk taka thil ngaihtuah thin a, hma sawn tum ngei turin a fuih zui a ni.

He hunah hian Mizoramin science & technology hman tangkaina hrang hranga hma a sawn dan chanchin ngaihnawm tak Dr. Aldrin Malsawmtluanga, Scientific Officer hnen atangin ngaihthlak a ni a. Tun hnaia Indian Space Research Organisation (ISRO), Bangalore-a North East Students Programme for Awareness, Reach and Knowledge on Space (NE SPARKS) programme-a zuk tel CLS Academy, Aizawla zirlai naupang te'n an kalna chanchin ngaihnawm takin presentation an pe a, a bengvarthlak hle bawk. Pi Lalrinnungi, Asst. Curator, Mizoram Science Centre chuan 'The amazing world of cold' tih thupuia hmangin science demonstration show a entir a, Innovation Facility Centre-a khawl hrang hrangte zirlaite a taka hrialhfiah an ni bawk a ni.

He hunah hian Department-a thawktute bakah CLS Academy leh Holy Mission School atanga zirtirtu leh zirlai te an tel a, Pu K. Lalrammuana, Principal Scientific Officer-in lawmthu sawina a hman hnuin he hun khar a ni.