1718/2025-2026 

Dated Aizawl, the 3rd October, 2025 : Higher and Technical Education leh School Education Minister Dr. Vanlalthlana chuan vawiin khan Aizawl City College Joint Students' Union (ACCJSU) kum 25 tlin lawmna hun chu Lalthanhawla Auditorium-ah khuallian niin a hmanpui a. Pu John Lalpeka, GIG Motors Chief Executive Officer chu khualzahawm a ni.

Khuallian Dr. Vanlalthlana chuan ACCJSU-te’n kum 25 an tling thei chu a lawmpui thu sawiin, zirlaite leh ram tana an ke pen a hmuh hmaih loh thu leh an hruaitute inpekna ropui a tih thu a sawi a. ACCJSU-te chu kum 25 champhaphak an thlenin kum 25 lo awm leh tur an thlir lawk a, tun atanga ngaihtuahna an sen a ngaih thu a chah a ni.

Minister chuan zirlai kalkhawmte chu kan ramina human capital kan neihte an nih thu hrilhin, zirna sang zawk lamah Mizoram chu che thain, tun hnaia National Institutional Ranking Framework (NIRF) ranking-ah Mizoram University (MZU) leh Pachhunga University College (PUC)-te thleng sang mah se school education lamah tun hnaia Ministry of Education-in Performance Grading Index 2.0 report a tlangzarhah Mizoram chu a tichhe berte zingah kan tel tih a sawi a. All India Service-a inziak tling kan neih lohna a rei tawh thu tarlangin, he’ng harsatnate leh zirlaite dawmkan dan tur zirchianga, zirna siamtha turin NITI Aayog nen an indawr tih a sawi a ni.

Minister chuan zirlaite hamthatna atana sawrkarin hma a lakte tarlangin, kum tam tak luah theih loh NIT Mizoram Lengpui Campus chingfel turin cheng vbc .10 an pek tawh thu leh forest clearance nghah mek a nih thu te, Mizoram Engineering College-ah pawh industry mila syllabus neih an tum thu te, State University atana Registrar leh Vice Chancellor lakna tur search committee din chhoh a nih tur thu te a sawi a. An sawrkar hnuah college sakthatna tur PM-USHA leh SASCI atangin cheng vbc. 100 chuang an dawn tawh thu te, Aizawla college-ho insem tur cheng nuai 1000 vel an dawn thu te, college fee ennawn mek a nih thu te a sawi a.

A ngheta college zirtirtu 32 lak an nih tur thu sawiin ‘qualified teacher’ chauh an lak thu leh an thawh hnua la ‘qualified’ lote chu ‘show cause notice’ an pek thu a sawi a. School Education Department a chan hnuah a hriat chinah chuan advertisement tel lova hna an la lak loh thu sawiin, dik taka hna lak a nih avangin zirlaite chu lehkha zir tang tang tur leh an zir rah an seng theih tur thu a hrilh a. Minister chuan tun hnaia scholarship a chhuak chu a lawm thu leh a rang thei ang bera an dawn theih nana an um nasat thu a sawi bawk a ni.

Education Minister Dr. Vanlalthlana chuan zirlaite chuan an awmna hmun apianga an hman tangkai theih tur thiamna, ‘metaskills’ an neih a ngaih thu sawiin, ‘communication skills’ tha nei tura an tan sauh sauh a ngaih thu a chah a. Artificial Intelligence (AI) khawvela an awm tawh avangin khawvel vir ruala vir ve zel turin ‘digital literacy’-a an san a ngai tih leh anmahni irawm chhuaka thil siam leh ngaihtuahna vawrhvir chawlhsan si lova AI hman dan an thiam a ngai tih a hrilh a ni.

Minister chuan Mizote chu ‘financial literacy’ lamah pawh kan tan a ngai nasa a ni, tiin, zirlaite chu tun atanga pawisa khawl tur leh insurance, a bik takin Pradhan Mantri Jeevan Jyoti Bima Yojana (PMJJBY) leh Pradhan Mantri Suraksha Bima Yojana (PMSBY) hnuaia ti turin a fuih a ni.

Rilru hrisel neih a pawimawhzia leh tunlaia hluar em em, ‘highlight reel effect’ – miin social media-a an hlawhtlinnate leh an chunga thil thleng tha chin chiah, a phena an harsatnate leh that lohnate tilang tel si lova an tarlan chu a tak emaw tia mahni insit phaha, hnual phahna – bawiha tang lo turin a chah a. Taksa sawizawi pawimawhzia a hrilh bawk a ni.

Khualzahawm Pu John Lalpeka pawhin thu sawiin, zirlaite chu hriselna ngai pawimawh turin a chah a. Midang nuna buai lovin anmahni nun dan inenlet a, inchhut thin turin a kawhhmuh a. Ram leh khawtlang hruaitute tlin lohna tlangaupui ai chuan mahni tlin leh tlin loh inenlet turin a hrilh a. Mi puitling chu a lawmna thinah a lawm reng lo a, a thlenna chin atanga hmasawn a tum reng tur a ni, a ti a. An duhzawng an neih theih nan mahni inthunun a pawimawh thu sawiin, hlawhtlinna leh hlawhchhamnate chu an tawpna tur a ni lo a, beih tang tang ngamna a pawimawh ber tiin a fuih a ni.

Thusawitu dang ACCJSU Founder President Pu Laldinpuia Tlau, MJS chuan ACCJSU din a lo nih dan sawiin, zirlaite chu an tum phawt chuan All India Service-ah an inziahtlin theih thu te, an nun fimkhur a ngaih thu leh public interest litigation hmanga ram siamthat hna thawk turin a chah a. ACCJSU-te chu ram tana theihtawp an chhuah theih nan duhsakna a hlan a ni.

ACCJSU Silver Jubilee lawmna hun hi ACCJSU President Pu Lalremtluanga'n kaihruaiin, Assistant General Secretary (AGS)Pu Lalthazuala atangin report ngaihthlak a ni a. ACCJSU Treasurer Nl. Lalruatkimi'n lawmthu sawiin hun a khar a ni.

AGS report atanga hriat danin, ACCJSU chu kum 2000-a din a ni a. An silver jubilee lawmna pualin intihsiakna hrang hrang huaihawt niin, a hnuaia tarlan ang hian vawiin khan lawmman sem a ni a:

NCC INDIVIDUAL

Mipa

1-na Laltlanzova HBC

2-na Moses Lalnunfima GAC

Hmeichhia

1-na Lalthazuali HBC

2-na PC Lalnuntluangi GAC

NCC CONTINGENT

1-na PUC

2-na HBC

3-na GAC

MARATHON

Mipa

1-na John Zonunsanga HBC

2-na Leo Thang Gin Khai PUC

3-na Isaac Lalchhandama PUC

Hmeichhia

1-na H Ngohlaso PUC

2-na Lalruatfeli PUC

3-na Loisy Lalnunpuii Govt. T. Romana College

ESSAY

(MSACS nen tangdunin, topic pahnih atangin an thlang a:

i. HIV laka inven hi mimal mawhphurhna

ii. HIV laka mahni dinhmun inhriat aiin inhriat loh a hlauhawm)

1-na P Vanlalchhanchhuaha PUC

2-na Stephen K Vanlalfakawma GAC

3-na R Lalhmangaihtluangi GAC

CULTURAL COMPETITION

Sarlamkai

1-na Huiva Cultural Club GAC

2-na Chhawkhlei Cultural Club PUC

3-na Zunleng Cultural Club HBC

Bawhhhla/Hlado

1-na Zunleng Cultural Club HBC

2-na Huiva Cultural Club GAC

3-na Kumtluang Cultural Club Govt. J. Thankima College

Cultural competition-a member intawiawm tha ber lawmman chu Women's Polytechnic Aizawl hnenah pek niin, inelnaa tel zawng zawngte hnenah participation prize pek a ni bawk.