1717/2025-2026
Dated Aizawl, 3rd October 2025 : Vawiin khan Public Health Engineering Department Minister Prof. Lalnilawma chuan Aizawl khawpui pumpelhna tur, Muallungthu atanga Sihhmui inkar kawng laih mek chu a hmunah kalin a endik a. Lei vung ten Aizawl khawpui chawmtu lui tuite a tih bawlhhlawh lohna tur leh nghawng tha lo a awm lohna tura hma la turin hnathawktute a chah.

Minister hi PHED bakah PWD, EF&CC, leh Aizawl Deputy Commissioner Office-a hotuten an tawiawm a, hmalakna kal mekte leh harsatna hrang hrang awm theite sawi ho a nih hnuin, hnathawhte vilzui tur leh enkawlzui tu tur Committee, Line Department hrang hrangte leh NGO te telna din tura rel a ni. Minister chuan, he kawng laih hna thawk tura rawih, R.G Buildwell Engineers Ltd. hotute chu, an hnathawhnaah environment ti chhe tam lo zawnga fimkhur tur leh leivungte pawh a paihna tur hmun dik tak (spoil bank) ah ngei paih thin turin a hrilh bawk.

Aizawl Western Bypass road laih mek hi PM-DevINE hnuaia hmalakna niin Km 46-a thui a ni a. Muallungthu khaw dai atanga peng tanin Sihhmui a pawh dawn a ni. He kawng hi Mizoram chhimlam atanga Rel-a zin turte leh bungraw phur lirtheite tan Aizawl khawpui tawt paltlang ngai lova chaklakna kawng pawimawh tak tur a ni dawn a ni.

Vawiin vek khan PHED Minister hian Samtlang leh Lungleng inkara Bypass road-in a paltlang tur hmunte leh Maubawk te tlawhnghalin hmalak zel dan turte a enpui nghal a ni.