Vawiin khan School Education Minister Pu Lalchhandama Ralte chuan Urban Development & Poverty Alleviation (UD&PA) Department buatsaih Aizawl Art Gallery-ah ‘Art Workshop-cum-Exhibition’ a hawng a, he Art Workshop hi Swachh Bharat Mission (Urban) hnuaia UD&PA Department hmalakna thar a ni.

Art Workshop hawnna inkhawm Mizoram Art Development Society (MADS) President Pu Laltanpuia kaihhruaiah Khuallian Pu Lalchhandama Ralte chuan rampumah sorkarin Swachh Bharat Mission kaltlangin faina lamah nasa takin hma a la mek zel a, hemi zarah hian India hmel danglam khawpin sorkar leh mipuite tangruala hnathawh a lang tan tawh a ni, a ti. Tunah hian UD&PA Department-in remhre takin lemziak thiamte hmangin mipuite faina lam inzirtirna kawngah rahbi thar hetiang Art Workshop & Exhibition’ a buatsaih hi a lawmawm takzet a ni tiin Pu Lalchhandama chuan Art Workshop-a tel tur lemziak thiam zawng zawngte duhsakna a hlan a. Taksa leh pawnlam faina piah lamah ‘kut fai leh thinlung thianghlim’ nei theuh turin mahni theuhah insiamthat leh hmasawn tuma pawimawh hle a ni, a ti bawk. Faina chungchang mipuite inzirtirna kawngah tumah an bang bik theih loh tih sawiin Khuallian chuan a bik takin media lamin faina chungchang an uar leh chanchinbumite phei chuan editorial-ah faina lam hawi ziak uar se a duh thu a sawi bawk.

UD&PA Director Pu Joseph H.Lalramsanga pawhin thu sawiin Faina hi sorkar hmalakna pawimawh tak a ni a, kum 2015 atang khan rampumah Swachh Bharat hi kalpui niin Mizoramah chuan SBM (Urban) hi UD&PA Department mawhah dah a ni, a ti a. MADS-in an sawmna ngai pawimawhin he Art Workshop-cum-Exhibition chu tihpuitlin a ni thei ta chu a lawmawm a tih thu a sawi bawk a. He Workshop-ah faina thupui hmanga lemziak zawng zawngte chu UD&PA Department-in copyright an chang ang a, Faina lam hawi thil tih leh thuziak leh advertisement an neih reng rengah UD&PA Department chuan an hmang zui thei dawn a ni tih a sawi bawk.

UD&PA Department-in SBM(Urban) hnuaia ‘Art Workshop-cum-Exhibition’ a buatsaihah hian vawiin leh naktuk ni 2 chhung hian - 1).Art Workshop-ah lemziak thiamten ‘Faina’ tih thupui hmangin lemziah nan hun an hmang ang a, 2).Art Exhbition hi Aizawl Art gallery-ah 1st February-8th February, 2019 chhungin dar 10:00AM-5:00PM thleng, man chawi ngai lova mipui tlawh theihin an lemziakte phochhuah a ni thung ang.