322/2025-2026
Lawngtlai, 24th April 2025 : Higher & Technical Education leh School Education Minister nibawk Dr. Vanlalthlana chuan Chakma Autonomous District Council (CADC) leh Lai Autonomous District Council ( CADC) huamchhunga zirna In hrang hrangte chu a hmunah kalin a enfiah.
Dr. Vanlalthlana chuan Government Kamalanagar College tlawh hmasa berin Principal leh Lecturer - ten lo dawngsawngin harsatna hrang hrang an neihte an lo thlen a . Minister chuan Zirna tihmasawn tura theihtawp chhuah a nih thu leh harsatna an neih ang angte a hmuna zirchiang tura lo kal a nih thu a sawi a.
Chief Minister- in an department chan zirchiang tur leh a hmun ngeia kal tura a tih angin Minister dang pawh an zinchhuah nasat thu a tarlang a. Hmasawnna tura mamawh an neih hrang hrangah 'Concept note' felfai taka lo siama Directorate lama thehlut thin turin a chah a. Dr. Vanlalthlana chuan PM RUSA chauh ni loin hmun danga atanga fund hmuh tuma hmalak reng a nih thu leh RUSA hnuaia Zirtirtute regularised thuai an nih tur thu a sawi. Zirtirtu indaihlohna chungchangah chak taka hmalak mek a nih thu sawiin, Government Kamalanahar College Library - a dah tur lehkhabu cheng nuai khat man hu a pek tur thu a sawi bawk.
Government Kamalanagar College hi 4th April,1992- a din niin, tun dinhmunah Teaching Faculty- 19 leh zirlai - 324 an awm mek a ni.
Education Minister chuan nikum May ni 27-a thliin a chhemthluk tak Upper Primary School, Mualbu 'L' a tlawh nghal a. School buliding chimta mai chuan mimal taka a rilru a khawih thu a sawi . Minister chuan buiding thar sakna tur cheng nuai 80 vel dah fel a ni tawh tiin, a hma thei ang bera sak that a nih tur thu a sawi a. Zirtirtu indaihlohna chungchang sawiin Dr. Vanlalthlana chuan chak taka hmalak mek a ni tiin, a bik takin Samagra Shiksha hnuaia zirtirtute siksawi tur an awm nuala, lungawi taka an thawhna hmuna an awm theihna turin In luahtur chungchangah khawtlang mipuite theihtawp lo chhuah turin a chah. Zirna hmangin ram siam that i tum ang u tia sawmin, Education Minister chuan Zirna hmasawnna tura a tul dan ang anga khawtlang mipuite ke pen turin a sawm nghal a ni.
Minister chuan Government Primary School- II Chawngte 'P' tlawhin, electrification, kitchen leh toilet a enfiah a. Government High School Chawngte 'P' tlawh lehin Science Teacher an mamawhnaah bawhzui a tum thu sawiin, Fencing - siam ngai chu ziaka Directorate- a lo thlen turin a chah. Government Middle School, Hmunlai building dinhmun enfiah bawkin Goverment Upper Primary School, Chawngtelui tana Computer-5 pek a nih tur thu leh electrification- tih thuai a nih tur thu a sawi . RMSA New Secondary School Khawmawi a Teachers' Quarters sak mek leh Ngengpuikai Secondary School ( Samagra Shiksha ) Teachers' Quarters- sak zawhfel tawh a tlawh nghal bawk.
Dr. Vanlalthlana, Minister for School Education, Higher & Technical Education, hi Tuichawng bialtu MLA Pu Rasik Mohan Chakma, Pu Malsawmtluanga, Joint Secretary, School Education Department, Pu C. Lalthanzira, State Project Director, Samagra Shiksha,Mizoram, Prof. Benjamin Lalrinsanga, State Nodal Officer ( NEP) Higher & Technical Education Department, Pu H. Laltanpuia, Addl. DPC, Samagra Shiksha, Lawngtlai leh CADC - a EM ten an tawiawm a ni.
