Vawiin khan Pu Lalsawta, Education Minister chuan Dawrpui School Complex a tlawhin, Dawrpui School of Science and Technology in Science Exhibition an buatsaih chu khuallian niin a hawng nghal.
Pu Lalsawta chuan Mizoram chu khawvel hriata kan in pho lan theihna  pawimawh ber chu  human resource tha siam a ni  tiin Sawrkar pawhin zirna kalphung siamthat chu ngai pawimawhin, Education Reforms Commission, Mizoram (ECRM) a din a. July thla chhungin Commission chuan Sawkar a Report an thehluh tur thu a sawi.  

Minister chuan Dawrpui School Complex hnuaia sikul pali - Pre-School, Primary School, Middle School leh Higher Secondary School (Science) ten sap tawngin naupangte zirtirna an pek chu fakawm a ti a. Minister chuan zirna lamah engkim zir chawp vek a ngai a ni, tiin sikul naupangte chu an zirlaite   zir ve mai mai lovin thiam ngei tura zir turin a chah. Pu Lalsawta chuan nu leh pa kalkhawmte chu an fate  khawngaihna ni lovin hmangaihnaa enkawl thin turin a chah.

Minister chuan Science Exhibition ah exhibit pho chhuah te chu a enkual bawk a, ngaihnawm a ni thu a sawi.

Dawrpui School Complex hi 1922 ah Primary sikul atanga din tan niin, tunah chuan he Complex chhungah hian Pre-School, Primary School, Middle School leh Higher Secondary School (Science) te chu a hrang theuha din a ni tawh a; Anganwadi Centre pawh Complex chhungah a awm bawk a ni. Dawrpui School Complex -ah hian naupang 510 awmin, zirtirtu 40 in an enkawl a ni.