2768/2026-2027

Aizawl the 22nd October, 2026: Vawiin khan Education Minister Dr. Vanlalthlana chuan a Office Chamber-ah INSPIRE Awards MANAK, National Awardee Hmangaihsangi, Neuhof School (Tuna Govt. Mizo Higher Secondary School a class XI zirlai) naupang chu lawmpuina a hlan.

INSPIRE MANAK hnuaiah hian India ram pumpuia Class 6 aṭanga Class 12 zirlaite hnen aṭangin idea maktaduai khat (1 Million) online hmangin lakhawm ṭhin a ni a, chungte chu thlifimin, idea ṭha zual nuai khat (1 Lakh) thlanchhuah leh a ni. Heng idea thlan chhuah te hi model/prototype-ah siamin District/State Level Exhibition-ah pho chhuah leh ṭhin a ni.

State Level-a model/project ṭha zualte tan hian National Level Exhibition and Project Competition a buatsaih ṭhin a ni.

Hmangaihsangi hi October 12-14, 2026 a 12th National Level Competition & Project Competition, New Delhi-a neihah, India ram pum zirlai naupang 798 thlanchhuah aṭanga a ti ṭha lehzual 60 thlan chhuah zingah telin, National Award a dawng a ni.

Dr. Vanlalthlana chuan India rama zirlai naupang maktaduai khat (1 million) kara, a tiṭha zual 60 zinga Mizo naupang a tel thei hi a chhuangin a lawmpui thu a sawi a, Mizoram Middle School, High School leh Higher Secondary School zirlai naupang tam zawk an tel theihna turin nasa leh zuala hma lak a ṭul thu a sawi bawk.

Hmangaihsangi, National Awardee lawmpuina hi Pi Caroline Zoramthangi, Director, SCERT chuan kaihruaiin, Pu K. Lalthawmmawia, Commissioner & Secretary, School Education Department chuan a ṭawiawm a, SCERT Officer, Principal, Neuhof  School zirtirtute an tel bawk a ni.