Vawiin khan Lungdai-a HSLC Exam Centre thar hawn lawmnaah Education Minister Pu Lalsawta chu Khuallian niin Mizoram Youth Commission Chairman leh bialtu MLA ni bawk Pu Hmingdailova Khiangte chu Khual Zahawm a ni.

Lawmna inkhawm Lungdai VCP Pu K.Lalchawimawia kaihhruaiah thu sawiin Pu Lalsawta chuan khawvel hriat khawpa lehkhathiam, infiamna khawvela hmingthang tak tak leh thil dang dangah pawh hming chher khawpa mithiam kan nei chho zel hi a lawmawmin Mizo nula leh tlangvalte chu lehkha zirna lamah pawh an duai bik lo a ni tih a chiang a ni, a ti. Mizoramin dehchhuah leh thawnchhuah tur nei tam lo mahila kan thalaite kan chher thiam chuan mi hmantlak leh chhuanawm tak tak kan nei dawn a, chu chu hriain sorkar pawhin lehkha zir chungchangah kalphung thar leh tha zawk a duang mek a, nakum atang phei chuan zirlai naupang ten phur taka lehkha an zir theih nan inkaihhruaina danglam tak hman chhoh a ni dawn, a ti bawk. Zirna in te sorkarin engkim a tum sak hian hmasawn aiin thuanawp lam an pan duh tih hmuh a nih avangin tun atang chuan sikul tha ber ni tura inel tir a, sorkarin a ngaih pawimawh ber zirlai te zawkin sorkar tanpuina an chhawr tangkai theih tura hmalak a nih tur thu a sawi bawk.

Khual zahawm Pu Hmingdailova Khiangte pawhin thu sawiin Lungdai-ah HSLC Exam Cetnre hawn tak chu lawmawm a tih thu leh Exam Centre neih lawmna ringawtah tawp lova, Lungdai atanga lehkhathiam tak tak leh HSLC result tha tak nei tura tan la turin a chah a ni.

Lungdai HSCL Exam Centre thar lawmna hunah hian MBSE Chairman/Secretary Pu Laldawngliana, Kolasib DEO & DPC(RMSA) Pu B. Lianthlira leh Education Department officials te an tel ve a ni.