State Level Steering Committee(SLSC)on Jawaharlal Nehru National Urban Renewal Miission chu vawiin khan Chairman Pu Zodintluanga, UD&PA Minister hovin Chief Secretary conference hall-ah an thukhawm a. JNNURM hnuaia sorkar hmalak mekte thlir hovin Aizawl khawpui chei thatna tur project hrang hrang, Ministry of Urban Development a bawhzui tur te an sawi ho bawk.

He meeting ah hian Basic Services for Urban Poor(BSUP) hnuaia Lawipu-a chenna tur neilo te tana in sak project chungchang sawi ho a ni a. Minister chuan he project hi hun engemaw chen a khaihlak hnuah chhunzawm a nih thu leh chak taka kalpui a ni tih a tarlang a. Detailed project report siam that leh mek a nih dan pawh meeting ah hian tarlan a ni.

SLSC chuan Urban Infrastructure & Governance (UIG) hnuaia Mizoram-in project a neih, bawhzui hmasak ngaite an ngaihtuah a. Nikum lama thehluh tawh, Aizawl City Traffic and Transportation Plan (CTTP) chu Ministry of Urban Development lamin an la pawmpui loh avangin leh JNNURM Mission hun tawp a hnaih tawh avangin Mizoram tana ruahman sa, vaibelchhe 120 hman lova a liam mai loh nan chak taka Ministry ah bawhzui ni se an ti a. Urban Infrastructure & Governance hnuaia Mizoram sorkarin Aizawl khawpui tana road project a neih te, Vaivakawm - Mizoram University inkar kawngpui siam thatna tur te, Mizoram University - NH 44 “A”, Aizawl Ring Road project bakah Storm Drainage Project te chu Ministry ah chak taka nawrzui turin committee chuan a rel a ni.