Mizoram Adhoc Aided Middle School Teachers' Association (MAAMSTA) chuan vawiin khan an General Conference vawi 2-na chu Synod Conference Centre-ah an hmang a, Education Minister Pu Lalsawta chu Khuallian niin conference a hmanpui.

MAAMSTA member kalkhawm hmaah thu sawiin Minister Pu Lalsawta chuan Mizoram hmun hrang hranga Adhoc Aided School ten harsatna an tawh mek te chu sorkarin a hriatpui a, chinfel tumin tan a la mek a ni, a ti. Harsatna hrang hrang karah MAAMSTA member ten dawhtheih tak leh zirlaite tan thahnemngai taka hna an thawk zel avangin an chungah lawmthu a sawi bawk. Mizoram sikul zirnaah CCE hman tan a nih hnuah phei chuan adhoc aided teachers te an tangkai leh zual a, zitirtu indaihlohna pawh anmahni vangin engemaw chen chu phuhruk thei a ni, a ti. Ram Danpui-in khua leh tui te tan zirna tha pek chu tih makmawhah a siam a, khawvel ram dangte pawhin kan ram zirna chu entawn tlakah an hmu mek a. Mizote hian thildangah khawvel el thei lo mahila zirna hi kan ban phak, kan dinchhuahna tur leh kan hmingthatna tur a ni tih hriain lehkhathiam lamah midangte kan el thei a ni, Minister chuan a ti.

Vawiin MAAMSTA General Conference-a Khual Zahawm School Education Secretary & Director Pi Esther Lalruatkimi chuan MAAMSTA member te harsatna hrang hrang a sawipui a, zirtirtute chu hun vawn dik tur leh an zirlaite tan hmasawnna thlen theih tur zirtirna uluk pe turin tan la zel turin a chah bawk.

Kum 2011-2012 chhunga MAAMSTA hruaitu thar tur te chu vawiin General Conference-ah hian thlan a ni nghal bawk a, chungte chu :
President        : C. Lalthantluanga
Vice-President    : Lalrinchhana
Gen. Secretary    : Lalmuanchhunga
Jt. Secretary        : Lalthakima Chawngthu
Treasurer        : Rothuampuii
Information Secy.    : C. Sangrotluanga te an ni.